लोकगायक अर्जुन सापकोटाको गीत 'बस्यौ अलक्कै' लाई छोटो समयमै युट्युबमा एक करोडभन्दा बढीले हेरेका छन्।
सार्वजनिक भएको तीन महिना नपुग्दै गीत करोड क्लबमा पुगेको हो।
अर्जुन र शान्तिश्री परियारको स्वर रहेको गीतलाई हालसम्म १ करोड ३ लाखभन्दा बढीपटक हेरिएको छ।
यो गीत लामो समय युट्युब ट्रेन्डिङको शीर्षस्थानमा पर्न सफल थियो। फेसबुक रिल्स र टिकटकमा समेत गीतले चर्चा पाएको थियो।
अर्जुनकै संगीत रहेको गीतका शब्द सन्तोष सापकोटाले लेखेका हुन्।
भिडिओमा अर्जुन र गरिमा शर्मा फिचर्ड छन्। विशाल घिमिरे भिडिओका निर्देशक हुन्।
पछिल्लो समय गायक अर्जुनका एकपछि अर्को गीत रुचाइएका छन्। 'पानी परेको', 'डाँडैको टुनी', अनि अहिले 'बस्यौ अलक्कै' ले चर्चा पाएको हो।
यसअघि उनका 'पछयौरी लिस्यो', ‘दुई दुना चार’ लगायतका गीत हिट छन्।
यसपटक गायिका शान्तिश्री परियारले आफ्नो अफिसियल गीतमा अर्जुनसँग सहकार्य गरेकी छन्। जुन गीत शनिबार सार्वजनिक हुँदैछ।
