दक्षिण भारतीय अभिनेता प्रभास यतिबेला फिल्म 'द राजा साब' का कारण थप चर्चामा छन्। 'बाहुबली', 'बाहुबली २' लगायतका फिल्मबाट फिल्म जगतमा इतिहास रचेका प्रभास 'द राजा साब' मा पूर्णतया फरक अवतारमा देखिनेछन्।
यो फिल्मको टिजर सोमबार मात्रै सार्वजनिक गरिएको थियो, जसमा उनी फरक अवतारमा छन्।
डिसेम्बरमा विश्वव्यापी प्रदर्शनमा आउने यो फिल्मको रिलिज तालिका पहिले अप्रिलमा थियो। तर, भव्य क्लाइमेक्स दृश्य छायांकन र भिजुअल इफेक्ट (भिएफएक्स) को भारी प्रयोगको कारणले रिलिज पछि सरेको निर्माणपक्षले जनाएको छ।
हरर कमेडी विधाको 'द राजा साब' मा मारूतिको लेखन तथा निर्देशन छ भने यसलाई टीजी विश्व प्रसादले निर्माण गरिरहेका छन्। भारतीय संचारमाध्यम नवभारत टाइम्सका अनुसार यो फिल्मको छायांकन १ सय २० दिन भएको थियो।
छायांकनबारे निर्माताले भनेका छन्, 'मलाई थाहा छैन मारूतिले कसरी तालिका व्यवस्थापन गर्यो। उनी बिहान ६ बजे सुटिङ सुरू गर्थे र राति १० वा ११ बजेसम्म सुटिङ गर्थे। र यो १२० दिन (लगभग ४ महिना) सम्म चल्यो।'
फिल्ममा ४० मिनेटको क्याइमेक्स दृश्य रहेको र क्लाइमेक्स दृश्यको भिएफएक्सका लागि मात्रै ३ सय दिन लागेको निर्माताले बताएका छन्।
टीजी विश्व प्रसादले भनेका छन्, 'प्रभासको फिल्मको छायांकन १२० दिन र भिएफएक्सका लागि ३०० दिन लाग्यो। भिएफएक्स धेरै महत्वपूर्ण थियो। त्यसैले ढिलाइ भयो। मलाई थाहा छ सबै निराश थिए। तर गुणस्तरलाई उत्तम तरिकाले प्रदान गर्नु महत्वपूर्ण थियो।'
'द राजा साब' मा प्रभाससहित मालविका मोहनन, निधि अग्रवाल, रिद्धि कुमार, सञ्जय दत्त लगायतको अभिनय छ।
यसलाई यस वर्षको तेलुगु भाषाको सबैभन्दा प्रतीक्षित फिल्महरूमध्ये एक मानिएको छ।
