भारतीय अभिनेता रणवीर सिंहको फिल्म 'धुरन्धर' ले बक्स अफिसमा बलियो प्रदर्शन गरिरहेको छ। चौथो दिन मात्रै झण्डै २० करोडभन्दा बढी कमाई गर्दै फिल्मले उत्कृष्ट होल्ड देखाएको छ।
फिल्मले रिलिजको पाँच दिनमा भारतमा करिब १५० करोड भारू बराबरको बक्स अफिस कमाइ गरेको भारतीय संचारमाध्यमले जनाएका छन्। यसैबीच, फिल्मको ओटिटी अधिकार महंगो मूल्यमा बिक्री भएको समाचार आएको छ।
बलिउड हंगामाका अनुसार नेटफ्लिक्सले धुरन्धरको दुवै भागको स्ट्रिमिङ अधिकार करिब १३० करोड भारूमा किनेको छ।
अहिले ओटिटी मूल्य घटिरहेको समयमा यो रकम निकै ठूलो मानिएको छ। यसअघि रणवीरको '८३' ले करिब ३० करोडमा नेटफ्लिक्स डिल पाएको थियो भने 'रक्की और रानी की प्रेम कहानी' ले अमेजन प्राइमबाट करिब ८० करोड कमाएको थियो।
'धुरन्धर' को पहिलो भागको सफलता र महंगो मूल्यका ओटिटी बिक्रीले दोस्रो भागप्रति पनि व्यापारिक अपेक्षा निकै बढेको छ।
गत शुक्रबारदेखि प्रदर्शनमा आएको आदित्य धर निर्देशित 'धुरन्धर' नेपालका सिनेमा हलहरूमा समेत चलिरहेको छ। फिल्ममा रणवीरसहित अक्षय खन्ना, सञ्जय दत्त, अर्जुन रामपाल, आर माधवन, सारा अर्जुन लगायतको पनि अभिनय छ।
-1763886130.jpeg)
-1746009348.jpg)
