बलिउड अभिनेता अजय देवगन र अभिनेत्री काजोलकी छोरी न्यासा देवगन चर्चामा आइरहन्छिन्।
सामाजिक सञ्जालमा उनको तस्बिर भाइरल भइरहेको हुन्छ। हरेक पटक एउटा प्रश्न उठ्छ- 'के न्यासा फिल्ममा आउँदैछिन्?'
तर हालै एक कार्यक्रममा काजोलले यस प्रश्नको जबाफमा भनिन्, 'आउँदिनन्! उनी भर्खर २२ वर्षकी भइन्। जहाँसम्म मलाई लाग्छ उनले फिल्म नखेल्ने मन बनाइसकेकी छन्।'
कार्यक्रममा उनलाई फिल्म क्षेत्रमा आउन चाहने युवा या युवतीलाई के सल्लाह दिन चाहनुहन्छ भनेर सोधिएको थियो। यसको जबाफमा उनले भनिन्, 'सबैभन्दा पहिलो कुरा, सबैको सल्लाह नलिनु। किनकी तपाईले फिल्ममा आउन के गर्नुपर्छ भनेर सोध्नु भयो भने भन्छन्- नाक परिवर्तन गर्नुस्, हात परिवर्तन गर्नुस्, कपालको रंग परिवर्तन गर्नुस्। तपाई आफै अल्मलमा पर्नुहुन्छ।'
काजोल आगामी फिल्म 'मां' मा देखिनेछिन्। फिल्मलाई विशाल फुरियाले निर्देशन गरेका हुन्। फिल्ममा काजोलसँगै रोनित रोय, इन्द्रनील सेनगुप्ता, खेरिन शर्मालगायत कलाकारको अभिनय छ। यो फिल्म २७ जुनदेखि हलमा प्रदर्शन हुनेछ।
