बलिउड अभिनेत्री जान्हवी कपूर फिल्म 'उलझ' लाई लिएर चर्चामा छिन्।
यो फिल्म २ अगस्तदेखि हलमा प्रदर्शन भइरहेको छ। फिल्ममा जान्हवीको अभिनय र भूमिकालाई दर्शकले रूचाइरहेका छन्। यसैबीच 'उलझ' को क्लाइमेक्स सिनको चर्चा भइरहेको छ। फिल्मको क्लाइमेक्स सिनमा जान्हवी खाली खुट्टा दौडिरहेकी छन्।
उनी भोपालमा १००० मिटर खाली खुट्टा दौडिएकी हुन्। फिल्ममा जान्हवीले एक आइएफएस अधिकारीको भूमिका निर्वाह गरेकी छन्। फिल्मका निर्देशक सुधांशु सरियाले फिल्मको धेरै छायांकन लन्डनमा भएको बताएका छन्। तर फिल्मको क्लाइमेक्स सिन भोपालमा छायांकन गरिएको हो।
'जुन दिन छायांकन हुँदै थियो, त्यसभन्दा एक दिन अघि पानीले पुरै छायांकन सेट बर्बाद भयो। हामीले लोकेशनलाई फेरि तयार गर्न निकै मिहेनत गरेका थियौं। सिन छायांकन हुनुअघि जान्हवीसँग केही कुराकानी गरेका थियौं। फिल्मको लागि जान्हवी १००० मिटर खाली खुट्टा दौड्नु पर्ने थियो,' उनले भने।
फिल्ममा जान्हवीसँगै गुलशन देवैया, रोशन मैथ्यू, राजेश तैलंग, आदिल हुसैन, मेयाङ चाङ, राजेन्द्र गुप्ता, जितेन्द्र जोशीलगायत कलाकारको अभिनय छ। यो फिल्मले पहिलो दिन १ करोड १५ लाख भारू कमाएको छ।
