अनन्त अम्बानी र राधिका मर्चेन्टको विवाहमा हलिउडदेखि बलिउडसम्मका कलाकारलाई बोलाइएको थियो। समारोहमा थुप्रै कलाकार उपस्थित भए। तर केही कलाकार विवाहमा उपस्थित भएनन्।
उनीहरूको विवाह १२ जुलाईमा भएको हो। यसअगाडि २ वटा प्रि-वेडिङ समारोह आयोजना गरिएको थियो। त्यस्तै ५ जुलाईदेखि उनीहरूको संगीत समारोह सुरू भएको थियो।
विराट कोहली र अनुष्का शर्मा
भारतीय क्रिकेट खेलाडी विराट कोहली र अभिनेत्री अनुष्का शर्मा अनन्त अम्बानीको कुनै पनि विवाह समारोहमा सहभागी भएनन्। उनीहरू यतिबेला लन्डनमा छन्।
कंगना रनावत
अभिनेत्री कंगना रनावत अनन्त अम्बानीको विवाह समारोहमा देखिइनन्। उनी आफ्नै आफन्तको विवाहमा सहभागी हुन हिमाचल प्रदेशमा पुगेकी थिइन्।
करीना कपूर खान र सैफ अली खान
अभिनेत्री करीना कपूर खान र सैफ अली खान अनन्त अम्बानीको विवाहमा देखिएनन्। उनीहरू यतिबेला छुट्टी मनाउन बाहिर गएका छन्। अभिनेत्री करीनाले इन्स्टाग्राममा अनन्त र राधिकालाई बधाई दिँदै मिस गरिरहेका बताएकी थिइन्।
देओल परिवार
देओल परिवार पनि विवाहमा देखिएनन्। हेमा मालिनी, धर्मेन्द्र, बबी देओल, सनी देओल कुनै पनि कलाकार अनन्तको विवाहमा देखिएनन्।
काजोल
अनन्त र राधिकाको विवाहमा अजय देवगन पुगेका थिए। तर उनकी श्रीमती काजोल उपस्थित भइनन्।
आमिर खान
अनन्तको विवाहमा अभिनेता आमिर खान सहभागी भएका थिएनन्। तर उनका ज्वाइँ नुपुर शिखरे र छोरी आइरा खान सहभागी भएका थिए।
शिल्पा शेट्टी
अभिनेत्री शिल्पा शेट्टी हरेक पार्टीमा सहभागी हुन्छिन्। तर उनी अम्बानीको विवाहमा सहभागि भइनन्।
अक्षय कुमार
अनन्तको विवाहमा अक्षय कुमार देखिएनन्। उनलाई कोरोना संक्रमण भएपछि उनी विवाहमा सहभागी भएनन्।
सोनाक्षी सिन्हा
अभिनेत्री सोनाक्षी सिन्हा अनन्तको विवाहमा देखिइनन्। उनले हालै अभिनेता जहीर इकबालसँग विवाह गरेकी छन्। उनी यतिबेला फिल्म ‘काकुन्डा’ को प्रमोशनमा व्यस्त छिन्।
श्रद्धा कपूर
अभिनेत्री श्रद्धा कपूर पार्टीमा कमै देखिन्छिन्। उनी अनन्त र राधिकाको विवाहमा पनि देखिइनन्। उनी यतिबेला आफ्नो आगामी फिल्ममा व्यस्त छिन्।
सोनम कपूर
अभिनेता अनिल कपूरले अनन्त अम्बानीको विवाहमा खुब डान्स गरेका थिए। तर उनकी छोरी सोनम कपूर अनन्तको विवाहमा देखिएकी थिइनन्। उनी यतिबेला लन्डनमा छिन्।
