भारतीय अभिनेत्री नूर मालाबिका दास मृत भेटिएकी छन्।
३७ वर्षकी अभिनेत्रीको मृत्युको खबरले फिल्म क्षेत्रमा हलचल मच्चिएको छ। उनको शव आफ्नै अपार्टमेन्टमा कुहिएको अवस्थामा फेला परेको हो। छिमेकीले फ्ल्याटबाट दुर्गन्ध आएको गुनासो गरेपछि नूरको मृत्युबारे थाहा भएको थियो।
भारतीय सञ्चारमाध्यम मिड डेका अनुसार पुलिस उनको लोखन्डवालास्थित फ्ल्याटको ढोका खोल्दा नूरको शव पंखामा झुण्डिएको अवस्थामा फेला परेको थियो। प्रहरीले तत्कालै शवलाई पोस्टमार्टमका लागि पठाएको थियो।
प्रहरीका अनुसार उनको मृत्यु ६ जुनमा भएको थियो। उनको शव बुझ्न उनका परिवारको सदस्य नआएपछि प्रहरीले एक एनजिओको सहयोगमा आइतबार अन्तिम संस्कार गरेको छ।
नूर मालाबिकाले अभिनेत्री काजोलसँग काम गरेकी थिइन्। उनले ओटिटी सिरिज 'द ट्रायल' मा काम गरेकी थिइन्।
