दक्षिण भारतीय अभिनेता अल्लु अर्जुन र अभिनेत्री रश्मिका मन्दना अभिनीत प्रतिक्षित फिल्म 'पुष्पा २- द रूल' को दोस्रो गीत सार्वजनिक गरिएको छ।
बुधबार सार्वजनिक 'अंगारोन' लाई जोडी गीतका रूपमा प्रस्तुत गरिएको छ। भिडिओमा अल्लु र रश्मिकाको नृत्य हेर्न सकिन्छ।
यो गीतमा श्रेया घोषालको स्वर छ। देवी श्री प्रसादको संगीत रहेको गीतमा रकिब आलमको शब्द छ।
फिल्म 'पुष्पा २- द रूल' का लेखक तथा निर्देशक सुकुमार बान्द्रेडी हुन्। नवीन येर्नेनी र रविशंकर यलमाञ्चिली निर्माता रहेको फिल्ममा अल्लु र रश्मिकाका साथमा फहद फासिल, धनञ्जय, राव रमेश, सुनिल, अनसूया भारद्वाज र अजय घोषको अभिनय छ।
यसअघि 'पुष्पा' ब्लकबस्टर भएकाले 'पुष्पा २' लाई लिएर निकै चर्चा र पर्खाइ देखिएको छ।
यो फिल्म भारतीय स्वतन्त्रता दिवसको अवसर पारेर १५ अगस्ट २०२४ (साउन ३१) मा रिलिज हुनेछ।
