अभिनेत्री नताशा स्टानकोभिन र क्रिकेटर हार्दिक पाण्ड्याले सम्बन्ध विच्छेद गर्न लागेको खबर बाहिरिएको छ।
भारतीय सञ्चारमाध्यम दैनिक जागरणका अनुसार हार्दिकले आफ्नो ७० प्रतिशत सम्पत्ति नताशालाई दिने भएका छन्।
नताशा र हार्दिक दुवैले सम्बन्ध विच्छेदको बारेमा केही बताएका छैनन्। यसैबीच नताशाको एक भिडिओ भाइरल भइरहेको छ। जसमा उनी आफ्नो पूर्व प्रेमी अली गोनीसँग देखिएकी छन्।
नताशा र अली लामो समयसम्म प्रेम सम्बन्धमा थिए। उनीहरू 'नच बलिये ९' मा समेत देखिएका थिए।
सर्वियन नागरिक नताशाले बलिउडमा पनि काम गरेकी छन्। उनले प्रकाश झा निर्देशित फिल्म 'सत्याग्रह' बाट डेब्यू गरेकी हुन्। सन् २०१२ मा भारत आएकी नताशाले उक्त फिल्मको आइटम गीतमा नाचेकी थिइन्।
त्यसपछि र्यापर वादशाहको म्युजिक भिडिओ खेलिन्। सन् २०१४ मा उनी सलमान खानले चलाउने टिभी कार्यक्रम बिग बोसमा सहभागी भइन्।
उनलाई र्यापर बादशाहकै ब्लकबस्टर गीत 'डिजेवाला बाबु' बाट लोकप्रियता मिल्यो।
नताशाले शाहरूख खानको फिल्म 'जिरो' मा पनि अतिथि भूमिका निर्वाह गरेकी छन्। योसँगै उनी रणवीर सिंहसँग थुप्रै विज्ञापनमा देखिएकी छन्।
