भारतीय रियालिटी शाे 'बिग बोस १७' पछि चर्चामा छिन् अभिनेत्री अंकिता लोखन्डे।
शोबाट बाहिर आएपछि उनी लगातार काम गरिरहेकी छन्। हालै उनी रणदीप हुड्डाको फिल्म 'स्वतन्त्र वीर सावरकर' मा देखिएकी थिइन्। यस फिल्मबाट उनको खुब तारिफ पनि भयो। यसैबीच उनी आफ्नो श्रीमान विक्की जैनसँग एक म्युजिक भिडिओमा देखिएकी थिइन्।
'पवित्र रिश्ता' बाट चर्चामा आएकी अंकिताले लामो समयसम्म टेलिशृंखलामा काम गरेकी थिइन्। पछिल्लो समय उनी फिल्ममा काम गरिरहेकी छन्।
हालै उनलाई करण जोहरको 'स्टुडेन्ट अफ द इयर ३' को अफर आएको थियो। तर अंकिताले 'स्टुडेन्ट अफ द इयर ३' को अफर अस्वीकार गरेकी छन्। अंकिताले यसबारे केही खुलाएकी छैनन्।
भारतीय सञ्चारमाध्य पिंकभिलाका अनुसार यो फिल्म नभई बेव सिरिज हुने बताइएको छ। सन् २०१२ मा आएको फिल्म 'स्टुडेन्ट अफ द इयर' मा आलिया भट्ट, वरुण धवन र सिद्धार्थ मल्होत्रा देखिएका थिए भने सन् २०१९ मा आएको दोस्रो भागमा टाइगर श्राफ, अनन्या पाण्डे र तारा सुतारिया देखिएका थिए।
