भारतीय निर्देशक सञ्जय लीला भन्सालीको वेब सिरिज 'हीरामन्डी: द डायमण्ड बजार' को गीत सार्वजनिक भएको छ।
सोमबार नेटफ्लिक्स इन्डिया युट्युब च्यानलमार्फत 'आजादी' बोलको गीत सार्वजनिक गरिएको हो। एम तुराजको शब्द रहेको गीतमा सञ्जय लीला भन्सालीले संगीत भरेका छन्। गीतमा अर्चना गोरे, प्रगति जोशी, अदिती प्रभुदेसाईं, अरोही, अदिती पल, तरनुम मलिक जेन, दिप्ती रेगेको स्वर छ।
सिरिजमा मनिषा कोइराला, अदिति राव हैदरी, ऋचा चढ्ढा, सोनाक्षी सिन्हा, शर्मिन सहगल, सञ्जीदा शेखलगायत कलाकारको अभिनय छ।
भन्साली निर्देशित पछिल्लो फिल्म 'गंगुबाई काठियावाडी' ले बक्स अफिसमा राम्रो व्यापार गरेको थियो। यो फिल्म सन् १९६० को दशकमा मुम्बई कमाठीपुरामा एउटा 'वेश्यालय' चलाउने गंगूबाईको जीवनीमा आधारित थियो।
वेब सिरिज 'हीरामन्डी' पनि 'वेश्यालय' चलाउने रानीहरूको कथामा आधारित छ।
फिल्मसिटीमा 'गंगुबाई काठियावाडी' को सेट जहाँ बनाइएको थियो, त्यही नै 'हीरामन्डी' को सेट बनाइएको हो।
यो सिरिज २०२४ मे १ देखि नेटफ्लिक्समा रिलिज हुनेछ।
