दक्षिण भारतीय अभिनेता अल्लु अर्जुन यतिबेला आगामी फिल्म 'पुष्पा २' को छायांकनमा व्यस्त छन्।
'पुष्पाः द राइज' को अपार सफलतापछि यसको दोस्रो पार्टलाई लिएर दर्शक उत्साहित छन्। 'पुष्पा' को सफलतापछि अल्लु अर्जुनलाई ठूला-ठूला कम्पनीहरूले ब्रान्ड एम्बेसडर बनाउने अफर दिइरहेका छन्।
उनलाई विभिन्न कम्पनीले फिल्ममार्फत आफ्नो कम्पनीको प्रचार गर्ने अफर पनि दिइरहेका छन्। फिल्ममा अल्लु अर्जुनलाई चुरोट खाइरहेको देख्न सकिन्छ। त्यसैले फिल्मसँग रक्सी र तम्बाकुको कम्पनी जोडिन चाहन्थे। जब पुष्पा पात्रले रक्सी पिउँछन्, तब उनीहरूको कम्पनीको लोगो देखियोस् भन्ने चाहन्थे।
भारतीय सञ्चारमाध्यमका अनुसार उनीहरूले १० करोड भारू दिने बताएका थिए। तर फिल्म निर्माण कम्पनी र अल्लु अर्जुनले उक्त अफर अस्वीकार गरेका छन्।
निर्माण टिम र अल्लु अर्जुन आफ्नो फिल्ममार्फत कुनै पनि ब्रान्डलाई विज्ञापन गर्न चाहँदैनन्। सुकुमार निर्देशित फिल्म 'पुष्पा २' मा अल्लु अर्जुन, रश्मिका मन्दना र फहद फासिलको मुख्य भूमिका छ।
यो फिल्म सन् २०२४ अगस्ट १५ अर्थात २०८१ साउन ३१ गतेदेखि प्रदर्शन हुनेछ।
