बलिउड अभिनेता रणवीर कपूर अभिनीत फिल्म 'एनिमल' ले विश्वभरबाट राम्रो कमाइ गरिरहेको छ।
भारतीय सञ्चारमाध्य दैनिक जागरणका अनुसार फिल्मले विश्वभरबाट ६ दिनमा ५२७ करोड ६० लाख भारू कमाइ गरेको छ। फिल्मले घरेलु बक्स अपिसमा ३१५ करोड ५० लाख भारू कमाएको छ भने हिन्दी संस्करणमा मात्रै २७८ करोड ४६ लाख भारू कमाएको छ।
यो अभिनेता रणवीर कपूरको दोस्रो सर्वाधिक कमाइ गर्ने फिल्म बनेको छ। उनी अभिनीत फिल्म 'सन्जु' ले विश्वभरबाट ५८६ करोड भारू कमाएको थियो।
फिल्मले विश्वभरबाट पहिलो दिन ११६ करोड, दोस्रो दिन १२० करोड, तेस्रो दिन १२०, चौथो दिन ६९ करोड, पाँचौ दिन ५६ करोड र छैटौं दिन ४६ करोड ६० लाख भारू कमाएको हो।
बलिउड फिल्मकर्मीले यो सर्वाधिक कमाइ गर्ने दोस्रो फिल्म बन्ने दावी गरेका छन्। फिल्मलाई दर्शकले मिश्रित प्रतिक्रिया दिइरहेका छन्।
सन्दिप रेड्डी वांगाले निर्देशन गरेको फिल्ममा रणवीरसँगै रश्मिका मन्दना, बबी देओल, अनिल कपूरको मुख्य भूमिका छ। फिल्ममा अनिल रणवीरको बाबुको भूमिकामा छन् भने रश्मिका उनको श्रीमतीको भूमिकामा देखिएका छन्।
