ऋषभ शेट्टीको लेखन, निर्देशन तथा अभिनय रहेको कन्नड फिल्म 'कान्तारा' ले बक्स अफिसमा सफलता हासिल गरेको थियो। यो फिल्मले सफलता हासिल गरेसँगै दोस्रो भाग बनाउने घोषणा गरिएको थियो।
सोमबार फिल्मको फर्स्ट लुक सार्वजनिक गरिएको छ। होम्बल फिल्म्स युट्युब च्यानलमार्फत फिल्मको फर्स्ट लुक सार्वजनिक गरिएको हो। सार्वजनिक भिडिओमा ऋषभलाई मात्र प्रस्तुत गरिएको छ।
यस फिल्मलाई पनि ऋषभले नै निर्देशन गर्नेछन्। फिल्मलाई 'कान्तारा ए लेजेन्ड च्याप्टर १' नाम दिइएको छ। यो फिल्मको लागि ठूलो सेट निर्माण गरिएको छ।
'कान्तारा' ले बक्स अफिसमा तहल्का मच्चाएको थियो। फिल्मले राम्रो कमाइ गर्नुको साथै सकारात्मक समीक्षा पाएको थियो। भारतीय समीक्षकहरूले फिल्मलाई वर्षकै उत्कृष्ट फिल्म बताएका थिए।
'कान्तारा' ले 'केजिएफ' को रेकर्ड तोड्दै कन्नड फिल्ममा सर्वाधिक कमाउने दोस्रो फिल्म बनेको छ।
