फिल्म 'रोल नम्बर १' निर्माण हुने भएको छ। आइतबार एक पोस्टर सार्वजनिक गर्दै फिल्मको निर्माण घोषणा गरिएको हो।
सेभेन सिज सिनेमाको प्रस्तुतीमा बन्न लागेको फिल्मलाई जोन योञ्जनले निर्देशन गर्नेछन्। यसमा कथा पनि उनकै रहनेछ।
योञ्जनले बाल मनोविज्ञानमा आधारित रहेर फिल्म निर्माण हुन लागेको बताए।
'यो एउटा प्रेरणादायी कथा हो,' उनले भने, 'तिहारपछि छायांकन गर्ने सोचका साथ तयारी थालेका छौं।'
फिल्मका लागि कलाकारहरू भने तय गरिएको छैन।
निर्माण टिमले सार्वजनिक गरेको पोस्टरमा कक्षाकोठामा पछाडि बेन्चबाट एक बालक हात उठाएर आफ्नो उपस्थिति जनाइरहेको देखाइएको छ। उनको पृष्ठभूमिमा निलो सर्ट लगाएका विद्यार्थी र अगाडि एक शिक्षिका देख्न सकिन्छ।
फिल्ममा महेश दवाडीको पटकथा तथा संवाद रहनेछ भने प्रशान्त शिवाकोटीको संगीत रहनेछ।
सेभेन सिज इन्टरटेनमेन्टले निर्माण गरेको फिल्म ‘अगस्त्य च्याप्टर १’ प्रदर्शनमा आइसकेको छ।
यो ब्यानरको अर्को फिल्म ‘पूर्ण बहादुरको सारंगी’ छायांकन सकिएर पोस्ट प्रोडक्सनको क्रममा छ।
