सिंगापुर प्रहरीमा कार्यरत् २२ वर्षीय नेपाली युवकविरूद्ध अदालतले पक्राउ पुर्जी जारी गरेको छ।
आत्महत्या दुरूत्साहन कसूरमा सुनसरी जिल्ला अदालतले धरान उपमहानगरपालिका-११ बसोबास रहेका आइतराज माबोविरूद्ध पक्राउ पुर्जी जारी गरेको हो।
उनको स्थायी घर झापा अर्जुनधारा नगरपालिका-४ हो।
अदालतका अनुसार माबोविरूद्ध असोज २६ गते पक्राउ पुर्जी जारी भएको छ।
भदौ २२ गते माबोकी श्रीमती २५ वर्षीया सोनियाङ्मा लिम्बू आफ्नै कोठामा मृत भेटिएकी थिइन्। सलको पासो लगाएर आत्महत्या गरेको प्रारम्भिक अनुसन्धानमा देखिएपछि प्रहरीले माबोसहित उनको परिवारका चार सदस्यविरूद्ध अदालतमा मुद्दा पुर्याएको थियो।
उक्त मुद्दामा पक्राउ परेका २० वर्षीय हेमकुमार माबो, २८ वर्षीया सञ्जु माबो र २५ वर्षीया बिमला माबोलाई अदालतले जनही एक लाख ५० हजार धरौटी माग गरी असोज २१ गते रिहा गरेको थियो।
सोनियाङ्माका बुवा शेरबहादुर लिम्बूको जाहेरीअनुसार उनलाई आत्महत्या दुरूत्साहन मुद्दामा पक्राउ पुर्जी जारी भएको सात दिनभित्र फेला नपरे ३५ दिने पुर्जी तामेल गराएर सोको जानकारी पठाउन आदेश जारी भएको छ।
उक्त पक्राउ पुर्जी इलाका प्रहरी कार्यालय धरानको नाममा जारी गरिएको छ।
धरान प्रहरीले सिंगापुरमा रहेका माबोलाई पक्राउ गर्ने प्रक्रिया अघि बढाइएको बताएको छ।
‘म्याद तामेलीका लागि अदालतबाट असोज २७ गते हामीलाई चिठी प्राप्त भएको छ,’ इलाका प्रहरी कार्यालय धरानका प्रहरी नायब उपरीक्षक ज्ञानेन्द्र बस्नेतले सेतोपाटीसँग भने, ‘हामी म्याद तामेलीको प्रक्रियामा छौं।’
घटनाको गम्भीरताअनुसार नेपाल प्रहरीले विदेशमा रहेका व्यक्ति पक्राउ गर्न इन्टरपोलमार्फत् ती व्यक्ति कहाँ छन् भनि पत्ता लगाउन डिफ्युजन नोटिस जारी गर्न सक्छ। पक्राउ गर्न सहयोग माग्नका लागि रेड नोटिस जारी गर्न सक्छ।
तर, यो सबै प्रक्रियाका लागि सम्बन्धित निकाय जिल्ला प्रहरी कार्यालय, प्रदेश प्रहरी कार्यालयबाट अनुरोध भई आउनुपर्ने इन्टरपोल शाखाका एसएसपी वीरेन्द्र बस्यालले बताए।
धरान प्रहरीले तोकिएको पक्राउ पुर्जीको समय गुजारेको खण्डमा यी प्रक्रिया थाल्न सकिने बतायो।
माइती पक्षले परिवारले यातना दिएर लिम्बूलाई आत्महत्या गर्न बाध्य पारेको बताउँदै आएको छ।
माबो र लिम्बूको बिहे भएको तीन महिना मात्रै भएको थियो।
