अमेरिकी नागरिक मिसेल अलेक्जेन्ड्रा वेल्चले पोखराको माटेपानीमा सोलार वितरणका लागि भनेर दान उठाउन प्रयोग हुने अनलाइन इन्डिगोगोमा लेखिन्, नेपालमा दैनिक १६ घण्टा लोडसेडिङ हुन्छ, हामी कक्षाकोठा र गुम्बामा नविकरणीय बिजुली प्रदान गर्न चाहन्छौं।’
उनले माटेपानी गुम्बाका भिक्षु, विद्यार्थी लगायतको फोटोसहित रकम दान गर्न आह्वान गरेपछि १० हजार ३२ अमेरिकी डलर जम्मा भयो। नेपालमा लोडसेडिङ अन्त्य भइसक्दा समेत उनले यस्तो अपिलमार्फत् उठाएको रकमबाट माटेपानीमा न त सोलार नै राखियो, न त्यो रकम नेपाल नै आयो।
मिसेलले नेपालमा ‘लर्निङ हाउस’ खोल्नका लागि भनेर अर्को अपिल गरिन्।
समुदाय, नेतृत्व विकास र शिक्षाका लागि भनेर लर्निङ सेन्टर बनाउन गरेको आह्वानमा १४ हजार १७६ अमेरिकी डलर जम्मा भयो।
यो पनि उतै हरायो, नेपाल आएन।
यतिमात्र होइन, मिसेलले पोखरामा कफी बनाउने बरिस्ता तालिम, नेतृत्व क्षमता विकासलगायत विभिन्न नाममा इन्डिगोगोबाट रकम उठाएको उक्त वेबसाइटले जनाएको छ।
उनले आफैंले चलाएको खाता लाइफ नामक वेबसाइटबाट पनि यसरी नै रकम उठाउने गरेकी छिन्।
मिसेलले आफ्नो साइटमा यसरी हालसम्म ७ लाख अमेरिकी डलर उठाइसकेको उल्लेख गरेकी छिन्।
नेपालका विभिन्न क्षेत्रमा सहयोग गर्ने नाममा उठाएका त्यतिका रकम अहिलेसम्म के गरिन्, कहाँ लगिन् कसैलाई थाहा छैन।
उनले नेपालमा बसेर अेमेरिका लगायतका ठाउँबाट सहयोग आह्वान गर्ने तर काम भने गरेको देखिँदैन।
नेपालमा बसेर अवैध धन्दा गरेको भन्दै पोखराकै लेभलनेक्स्ट कम्पनीका राजु बोगटीले अध्यागमन विभाग काठमाडौंमा गत साउनमा उजुरी दिए। अध्यागमनले त्रुटि नदेखिएको भन्दै मुद्दा सकिएको बताएपछि उनले गत मंसिरमा अध्यागमन कार्यालय पोखरा र पुसमा जिल्ला प्रशासन कार्यालयमा समेत उजुरी दिएका छन्।
उजुरी उपर अहिलेसम्म कुनै छानबिन नभएको बोगटीले बताए।
मिसेलले पोखरामा खोलेको लर्निङ हाउसका लागि अमेरिकी सहयोग कोषको फुल ब्राइट प्रोजेक्ट पनि हात पारिन्।
सामुदायिक संस्थालाई नेपालमा काम गर्न दिइने उक्त रकम जब व्यवसायिक कम्पनीमा गएको नेपालस्थित अमेरिकी दूतावासले थाहा पायो, यो फण्ड रद्द गरिदियो।
अमेरिकाबाट ६ वर्षअघि पहिलो पटक भिजिट भिसामा नेपाल आएकी मिसेल त्यसपछि रिसर्च भिसामा पृथ्वीनारायण क्याम्पसमा स्वयंसेवी लेक्चर बन्न भनेर नेपाल आइन्।
रिसर्च भिसाको पनि म्याद सकिएपछि भने उनी अहिले बिजनेस भिसामा नेपाल बसिरहेकी छिन्।
पोखरामा पनि उनले विभिन्न कार्यक्रमका नाममा पैसा उठाउने गरिरहेकी छन्।
उनले दान संकलन गर्न प्रयोग गरेको वेबसाइटमा आफ्नो परिचयमा सामाजिक कार्यकर्ता, लेखक र संस्थापक भएको उल्लेख गरेकी छिन्।
यसबारे बुझ्न खोज्दा मिसेल सम्पर्कमा आउन चाहिनन्।
