अर्बपति व्यापारी इलोन मस्क मान्छेलाई मंगल ग्रहमा पुर्याएर मानव जातिलाई बहु-ग्रहीय प्राणी बनाउन चाहन्छन्।
मंगल ग्रहमा मानव बस्ती बसाउन उनले स्पेस एक्स नामको कम्पनी नै बनाएका छन्। घट्दो जनसंख्याका कारण पृथ्वीमै मानव जाति संकटमा पर्न सक्ने भनेर उनले अमेरिका र युरोपका विकसित देशका नागरिकलाई बारम्बार धेरै बच्चा जन्माउन आग्रह गर्ने गर्छन्।
उनले अरूलाई अर्ति मात्रै नदिएर आफैले पनि त्यसको पालना गरिरहेका छन्। 'अति बुद्धिमान' छोराछोरीको ‘पल्टन’ नै बनाउने अभियानमा लागेका मस्कका चार जना महिलाबाट कम्तीमा १४ ज्ञात छोराछोरी छन्। त्यसबाहेक पनि उनका धेरै छोराछोरी भएको मानिन्छ।
अति बुद्धिमान छोराछोरीको ‘पल्टन’ हुर्काउनका लागि उनीहरूका आमाको बसोबासका लागि उनले टेक्सास राज्यको अस्टिनमा एउटा छुट्टै कोलोनीको परिकल्पना गरेको समेत द वाल स्ट्रिट जर्नलले लेखेको छ। मस्कको कम्पनी न्युरालिंककी क्यानडेली अधिकारी र उनका चार सन्तानकी आमा शिभन जिलिस सोही कोलोनीमा बस्छिन्।
यस्तोमा आफ्ना विभिन्न कम्पनी सञ्चालन गर्ने मात्रै नभएर अमेरिकी राष्ट्रपति डोनाल्ड ट्रम्पले सरकारी सेवा चुस्त पार्न बनाएको डोजका (डिपार्टमेन्ट अफ गभर्न्मेन्ट इफिसिएन्सी) प्रमुख रहेर समेत काम गरिरहेका मस्कले कसरी त्यति धेरै छोराछोरी र उनीहरूका आमाहरूको व्यवस्थापन गर्छन् भनेर जर्नलले चर्चा गरेको छ।
सो समाचारमा मस्कका एक छोराकी आमा एश्ली सेन्ट क्लेयरसँग लामो कुराकानी गरिएको छ भने मस्कका दुई छोरा र एक छोरीकी आमा ग्राइम्सको (क्लेयर बुसर) छोराछोरी कोसँग रहने भनेर चलेको मुद्दाबारे पनि चर्चा गरिएको छ।
ट्रम्पसँग ह्वाइट हाउसमा भएको बैठकमा मस्कले काँधमा बोकेका बच्चा ग्राइम्सबाटै भएका छोरा हुन्।
सो समाचारका अनुसार गत वर्ष भएको चुनावमा ट्रम्पलाई जिताउन मस्कको २५ करोड डलरभन्दा बढी पैसा परिचालन गरेका उनको ‘फेमिली अफिस’ का प्रमुख जेरेड बर्चलले उनको निजी जीवन पनि सम्हाल्छन्। बर्चलले नै ट्रम्पका सबै ज्ञान-अज्ञात छोराछोरी र उनीहरूका आमाको व्यवस्थापन गर्छन्।
गत सेप्टेम्बरमा मस्कको छोरालाई जन्म दिएकी सेन्ट क्लेयरले मस्क उनको छोराको बुवा भनेर डिएनए जाँच गराउन खोजेकी थिइन्। त्यसबेला बर्चलले बच्चाबारे केही नबोल्न उनलाई एक करोड ५० लाख डलर पैसा र छोरा २१ वर्षको नभइन्जेलसम्म उसलाई हुर्काउन हरेक महिना एक लाख डलरको प्रस्ताव गरेको सो समाचारमा उल्लेख छ।
विश्वका सबभन्दा धनी व्यक्ति मस्कले आफ्ना बच्चाका आमाहरूलाई पैसा दिने सम्झौता गर्दा जहिल्यै पनि आफू र ती बच्चाबारे केही पनि खुलासा नगर्ने कडा सर्त राख्ने गर्छन्। यस्तो सर्तमा मस्कले धेरैजना महिलासँग सम्झौता गरेर पैसा दिएको बर्चलले सेन्ट क्लेयरलाई बताएको सो समाचारमा भनिएको छ।
समाचारका लागि जर्नलले मस्कको प्रतिक्रिया माग्न सम्पर्क गरेपछि सेन्ट क्लेयरले पाउनु पर्ने मासिक किस्ता घटाएर २० हजार डलरमात्रै दिएको पनि जर्नलले खुलासा गरेको छ।
बर्चलले मस्क 'धेरै ठूलो हृदय भएको, दयालु र उदार व्यक्ति' भएको तर उनका बच्चाका आमाले कानुनी बाटो लिएमा ती आमालाई नोक्सान हुने भनेर सेन्ट क्लेयरलाई सचेत गराएका थिए।
बर्चलले त्यस्तो चेतावनी दिए पनि सेन्ट क्लेयरले मस्कलाई उनको छोराको बुवा कानूनी रूपमा घोषित गर्नुपर्ने र आफू एक्लैले बच्चा हुर्काउन पाउनु पर्ने भनेर मुद्दा हालेकी छन्।
आफ्ना छोराछोरीलाई ‘पल्टन’ (लिजन) भन्ने मस्कले आफ्नो सामजिक सञ्जाल एक्सलाई तीक्ष्ण बुद्धि भएका बच्चा जन्माउने महिला छान्ने प्रयोजनका लागि पनि प्रयोग गर्छन्। कतिपय महिलालाई त उनले एक्समा मेसेज (डिएम) गरेर आफ्नो बच्चा जन्माउने प्रस्ताव गर्छन्।
सेन्ट क्लेयरसँग पनि मस्कको चिनजान एक्सबाटै भएको थियो। मस्कको पोस्टमा प्रतिक्रिया दिनेक्रममा उनीहरू निकट भएका थिए। पछि उनी गर्भवती भएपछि मस्कले ‘सरोगेसी’को माध्यमले अरू महिलाहरूको प्रयोग गरेर मस्क र सेन्ट क्लेयरका धेरैवटा बच्चा जन्माउने प्रस्ताव गरेका थिए। त्यसो गरे ‘पल्टन’ छिट्टै ठूलो हुने मस्कको जिकिर थियो।
मस्कले आफ्नो बच्चा पाउने प्रस्ताव गरेका कति महिलाले आफूसँग कुरा गरेको दाबी सेन्ट क्लेयरले गरेकी छन्।
‘क्रिप्टोकरेन्सी ईन्फ्लुएन्सर’ टिफ्यानी फङ एक उदाहरण हुन्।
उनले मस्कको त्यस्तो प्रस्ताव अस्वीकार गरेकी थिइन्। उनले सो प्रस्तावबारे अरूलाई भनेको थाहा पाएपछि मस्कले उनलाई एक्समा अनफलो समेत गरे। मस्कले त्यस्तो प्रस्ताव राख्नुअघि एक्समा मस्कसँग अन्तर्क्रिया गर्ने फङले एक पटक दुई-हप्ताको अन्तरालमा २१ हजार डलर एक्सबाट कमाएकी थिइन्। मस्कले अनफलो गरेपछि फङको एक्सबाट हुने कमाइ धेरै घटेको थियो।
मस्कले यसरी आफ्नो बच्चा जन्माउन राजी हुने सबै महिलाका बच्चालाई आफ्नो आधिकारिक सन्तानको पहिचान नदिए पनि उनीहरूको पालनपोषणका लागि उचित पैसा दिने गरेका छन्।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1742801159.jpg)
