तुलसीपुरस्थित उच्च सरकारी वकिलको कार्यालय दाङ क्षेत्र नं. ३ मा बिहीबार हुने प्रतिनिधिसभा सदस्य पदको निर्वाचनका लागि निर्वाचन अधिकृतको कार्यालय तोकिएको छ।
तुलसीपुर उपमहानगरपालिका–६ स्थित यो निर्वाचन अधिकृतको कार्यालयमै मतदान पूरा भएपछि मतगणना सुरू हुनेछ। यहाँ प्रत्यक्ष र समानुपातिक तर्फको मतगणनाको लागि अलग–अलग तला र कोठाहरू तय गरिएका छन्।
दोस्रो तलाको एउटा कोठामा समानुपातिक तर्फको र त्योभन्दा माथिल्लो तलाको हलमा प्रत्यक्ष तर्फको मतगणना गर्ने गरी स्थापना गरिएको छ।
दाङ क्षेत्र नं. ३ का निर्वाचन अधिकृत महान्यायाधिवक्ता चन्द्रबहादुर सिंजालीका अनुसार मतगणना हुने स्थलहरूमा फलामे तारबारका साथै सिसी टिभी जडान भइसकेका छन्।
समानुपातिक तर्फको मतगणना हुने स्थलमा फलामे तारबारसहित एउटा सिसी टिभी जडान गरिएको छ भने प्रत्यक्ष तर्फको मतगणना हुने हलमा दुईतर्फ कुनामा दुई वटा सिसी टिभी जडान गरिएको छ।
निर्वाचन क्षेत्र दाङ क्षेत्र नं. ३ की प्रवक्ता सहायक न्यायाधिवक्ता टिकाकुमारी रोका (केसी) का अनुसार मतगणकहरू मात्रै तारबारभित्र बसेर मतगणना गर्ने छन्। फलामे तारबारको बाहिर दलका प्रतिनिधिहरूका लागि बेञ्चहरू राखिएका छन्।
समानुपातिकको मतगणा हुने स्थलमा तारबारको बाहिर एउटा बेञ्च राखिएको छ भने प्रत्यक्ष तर्फको मतगणा एउटा हलभित्र दुई ठाउँमा हुने भएको हुँदा त्यहाँ दलका प्रतिनिधि बस्नका लागि तीन/चार वटासम्म बेन्चहरू राखिएका छन्।
मतगणा सुरक्षित स्थल सुरक्षित बनाउन तारबार गर्नुका साथै सिसी टिभी जडान गर्नु परेको प्रवक्ता रोका (केसी) ले बताइन्।
दाङको क्षेत्र नं. २ अन्तर्गत पर्ने घोराहीस्थित मतदान अधिकृतको कार्यालय र दाङको क्षेत्र नं. १ अन्तर्गत पर्ने लमहीस्थित निर्वाचन अधिकृतको कार्यालय भित्रका मतगणना हुने स्थानहरूमा पनि यसैगरी तारजाली र सिसी टिभीहरू जडान गरिसकिएका छन्।
लुम्बिनीका अधिकांश ठाउँमा तारजाली र सिसी टिभी जडान
लुम्बिनी प्रदेशका १२ जिल्लाहरूमध्ये अधिकांश मतगणना हुने स्थलमा तारबारसहित सिसी टिभी जडान गरिएका छन्।
प्रदेश निर्वाचन कार्यालय घोराही दाङका प्रवक्ता गेहेन्द्र कँवरका अनुसार प्रदेशका अधिकांश मतगणना हुने स्थानमा फलामे तारबारका साथै सिसी टिभी जडान भइसकेका छन्।
दाङ, बाँके, बर्दिया, कपिलवस्तु, रूपन्देही, पश्चिम नवलपरासी, गुल्मी, रोल्पा, प्यूठान, पाल्पा, अर्घाखाँची, रूकुम पूर्व जिल्लाहरू यो प्रदेशमा पर्छन्। यो प्रदेशका एक मात्र हिमाली जिल्ला रूकुम पूर्व हो। रोल्पा, प्यूठान, अर्घाखाँची, गुल्मी र पाल्पा पहाडी जिल्लाहरू हुन्।
वाइफाइ र विद्युत नपुगेका एकाध पहाडी जिल्लाका मतगणनास्थल बाहेक तराई क्षेत्रका अधिकांश जिल्लाका मतगणना स्थलहरूमा फलामे तारबार सहित सिसी टिभी जडान गरिएको प्रदेश निर्वाचन कार्यालयका प्रवक्ता कँवरले बताए।
‘अब भोलिको मात्रै प्रतीक्षा छ,’ प्रवक्ता कँवरले भने, ‘मतदान स्थलका साथै मतगणना हुने स्थलको सुरक्षा व्यवस्थादेखि सम्पूर्ण तयारी पूरा भइसकेको छ।’
तीन वटै सुरक्षा अंगका साथै निर्वाचन प्रहरी पनि ठूलो संख्यामा खटाइएको हुँदा सुरक्षा व्यवस्था चुस्त रहने भन्दै ढुक्क भई मतदानमा सहभागी हुन प्रवक्ता कँवरले मतदातालाई आग्रह गरेका छन्।
त्यस्तै, उनले शान्तिपूर्ण र निर्भयका साथ निर्वाचन पूरा गराउन स्थानीय राजनीतिक दलदेखि सम्पूर्ण सरोकारवाला गम्भीर हुनु पर्ने बताए।
लुम्बिनी प्रदेशका १२ जिल्लामा २६ सिटका लागि पाँच सय ८२ जना उम्मेदवारको बीचमा प्रतिष्पर्धा हुँदैछ। प्रतिनिधिसभा सदस्य निर्वाचनका लागि बिहीबार बिहान ७ बजेदेखि बेलुकी पाँच बजेसम्म मतदानको समय सीमा तोकिएको छ।
२६ जना प्रतिनिधिसभा सदस्य चुन्न लुम्बिनीमा ३३ लाख ८६ हजार ६ सय ८० जनाले यो निर्वाचनका लागि मताधिकार पाएका छन्। जसमध्ये महिला मतदाताको संख्या १६ लाख ७१ हजार चार सय ७९ , पुरूष मतदाता १७ लाख १५ हजार एक सय ६३ र ३८ मतदाता रहेका छन्।
मतदान केन्द्रमा तयारी पूरा
बुधबार बिहान साढे ११ बजेतिर पुग्दा तुलसीपुर उपमहानगरपालिका वडा नं. ३ रहेको प्राथमिक विद्यालय राना गाउँ मतदान केन्द्रमा निर्वाचनको लागि सम्पूर्ण तयारी पूरा भइसकेको अवस्था थियो। मतदान व्यवस्थित र सुरक्षित बनाउने उद्देश्यले स्थानीय स्तरमा उपलब्ध बाँसका खाँबाहरू गाडी सकिएको थियो। गुलाबी रङका मतपेटिका पनि राखिसकिएका थिए। मतदान गराउनका लागि खटिएका कर्मचारीका लागि बस्ने बेन्चहरू राखिएका थिए। स्थानीय प्रतिनिधि र कर्मचारी मिलेर अब ती गाडिएका पोलहरूका डोरी टाँग्ने तयारी गरिरहेका थिए।
प्राबि राना गाउँ (ख) मतदान केन्द्रका मतदान अधिकृत धुर्बराज न्यौपानेका अनुसार फागुन २१ गतेको निर्वाचनको लागि लगभग सबै तयारी पूरा भइसकेको छ।
यो निर्वाचन केन्द्रमा कुल मतदाता एक हजार तीन सय ९९ जना छन्।
सोमबार नै जिल्लाका दश वटै पालिकमा ५१ प्रकारका निर्वाचन सामग्री सहित तीन हजार बढी कर्मचारी निर्वाचन प्रयोजनका लागि खटाइएका थिए।
जिल्लाका चार सय ५९ मतदान केन्द्रमा मतदान गराउनका लागि आवश्यक मतपेटिका तथा निर्वाचन सामग्री सहित कर्मचारी र सुरक्षाकर्मी पुगेर सोही दिनदेखि नै आवश्यक तयारी थालेको तथा सम्पूर्ण तयारी पूरा भइसकेको दाङका मुख्य निर्वाचन अधिकृत प्रकाशप्रसाद पण्डितले बताए।
‘मतदाताका लागि आवश्यक मतपत्र, मतपेटिका लगायतका आवश्यक सामग्री निर्वाचन अधिकृतको कार्यालय र प्रदेश निर्वाचन कार्यालयबाट बुझेर कर्मचारीसहित सुरक्षाकर्मीको टोली मतदान केन्द्रमा पुगेपछि योजना अनुसार धमाधम काम गरी सम्पूर्ण तयारी गरिसक्नुभएको छ। अब मतदानको मात्रै प्रतीक्षा छ,’ पण्डितले भने।
निर्वाचनका लागि खटाइएका कर्मचारीहरू खटाइएको ठाउँमा पुगेर मतदान स्थलको सरसफाइ गर्ने, शिल गर्ने, मदिरा निषेधित क्षेत्र तथा होहल्ला निषेधित क्षेत्र घोषणा गर्ने जस्ता कार्यहरू गरी धमाधम मतदान केन्द्र निर्माण गर्न सुरू गरेका थिए।
अधिकांश स्थानमा मंगलबारदेखि स्थानीय राजनीतिक दलसँग समन्वय बैठक गरेर मतदान केन्द्र निर्माण लगायतका काम धमाधम सुरू भएका थिए।
दाङका तीन निर्वाचन क्षेत्रमा रहेका चार सय ८२ वटा मतदान केन्द्रमा दुई हजार आठ सय ९२ जना र दुई वटा अस्थायी मतदान केन्द्रमा छ जना गरेर दुई हजार आठ सय ९८ जना कर्मचारी खटाइएका छन्।
निर्वाचन सुरक्षाका नेपाल प्रहरी, सशस्त्र प्रहरी, नेपाल प्रहरी र नेपाली सेना गरी जिल्लामा कुल पाँच हजार ५ सय ११ जना सुरक्षाकर्मी खटाइएका छन्।
जिल्लाभर कुल एक सय ५९ मतदान स्थल र चार सय ८२ वटा मतदान केन्द्र रहेका छन्। तीमध्ये १६ वटा मतदान केन्द्र अतिसंवेदनशील, एक सय ३४ वटा संवेदनशील र नौ वटा सामान्य श्रेणीमा वर्गीकरण गरी सुरक्षा व्यवस्था मिलाइएको प्रमुख जिल्ला अधिकारी विश्राज आचार्यले बताए।
जिल्लामा सबभन्दा कम मतदाता दाङ निर्वाचन क्षेत्र नं. २ को आधारभूत विद्यालय चाक्लिघाटमा जम्मा तीन सय ४२ मतदाता र सबभन्दा बढी मतदाता यही निर्वाचन क्षेत्रको पदमोदय पब्लिक उच्चमाथि भरतपुरमा १० हजार ९ सय ६९ मतदाता रहेका छन्।
फागुन २१ गतेको निर्वाचनका लागि जिल्लामा चार लाख ३१ हजार ६ सय ८६ जना मतदाताले मताधिकार पाएका छन्।
