धनुषाको हंसपुर नगरपालिकाका नगर प्रमुख प्रदीप कुमार यादवप्रति नेपाली कांग्रेसका शीर्ष नेताहरूले श्रद्धाञ्जली दिएका छन्।
नेपाली कांग्रेस मधेस प्रदेशका सभापति एवं मधेस प्रदेश सरकारका मुख्यमन्त्री कृष्ण प्रसाद यादव लगायतले श्रद्धाञ्जली दिएका हुन्।
कांग्रेस नेता विमलेन्द्र निधि, महेन्द्र यादव, उपसभापति चन्द्रशेखर यादव, महामन्त्री वृहस्पति कृष्ण श्रेष्ठ, सहमहामन्त्री जय नारायण प्रसाद यादव लगायतका नेताहरू स्वर्गीय यादवको निजी निवास पुगेर श्रद्धाञ्जली दिएका हुन्।
नेताहरूले स्वर्गीय प्रदीप कुमार यादवको पार्थिव शरीरमा पार्टीको झण्डा ओढाएर सम्मान गरे।
उनी नेपाली कांग्रेस मधेस प्रदेशका कोषाध्यक्ष र नगरपालिका संघका मधेस प्रदेश अध्यक्ष थिए।
प्रदीप नेपाली कांग्रेसको संगठन र स्थानीय तहको विकासमा इमानदार, समर्पित र जनप्रिय नेतृत्वका रूपमा स्थापित रहेको नेताहरूको भनाइ छ।
प्रदीप कुमार यादवको निधनले नेपाली कांग्रेस, मधेस प्रदेश तथा स्थानीय तहले एक सक्षम, कर्मठ र दूरदर्शी नेतृत्व गुमाएको भन्दै उनीहरूले शोकसन्तप्त परिवारजनप्रति गहिरो समवेदना व्यक्त गरे।
मस्तिष्कघात भएर उपचार गराइरहेका उनको सोमबार काठमाडौंको नर्भिक अस्पतालमा निधन भएको हो।
२०७९ सालको स्थानीय निर्वाचनमा उनी नेपाली कांग्रेसबाट मेयरमा निर्वाचित भएका थिए।
यसैबीच, नेपाली कांग्रेस मधेश प्रदेश कार्य समितिको आकस्मिक बैठकले स्वर्गीय यादवप्रति सम्मान व्यक्त गर्दै एक मिनेट मौन धारणसहित शोक प्रस्ताव पारित गरेको छ।
बैठकको निर्णयअनुसार मधेस प्रदेशका आठै जिल्लाका पार्टी कार्यालयहरू आज एक दिन बन्द राखिने, माघ २७ र २८ गते दुई दिन आधा झण्डा झुकाइने, शोक पुस्तिका राखिने तथा १३औँ दिन पुण्यतिथिका अवसरमा मधेश प्रदेश पार्टी कार्यालयमा श्रद्धाञ्जली सभा आयोजना गरिने निर्णय गरिएको छ।
-1746009348.jpg)
