कर्णाली प्रदेशका मुख्यमन्त्री यामलाल कँडेलले भदौ २३ र २४ गते भएको आन्दोलनमा जेन–जी पुस्ताका पवित्र मागहरूलाई स्वार्थी समूहले 'हाइज्याक' गरेको बताएका छन्।
नेकपा एमाले जनसंगठन समन्वय संयन्त्र कर्णाली प्रदेशले मंगलबार सुर्खेतमा गरेको भेलालाई सम्बोधन गर्दै मुख्यमन्त्री कँडेलले पवित्र उद्देश्य बोकेका जेन–जी समूहको ब्यानरमा निश्चित उद्देश्य बोकेका व्यक्ति र समूहले प्रविधिको दुरूपयोग गरी आतंक मच्चाएको आरोप लगाए।
'भ्रष्टाचार नियन्त्रण, स्थिर सरकार र सुशासन जस्तो पवित्र उद्देश्य र माग राखेका जेन–जी पुस्ताको आन्दोलनलाई हामी सबैले सकारात्मक मान्नुपर्छ,' उनले भने, 'तर उनीहरूलाई प्रयोग गरेर देशको सार्वभौमिकतामाथि प्रहार गर्ने गलत कामहरू भए, जेन–जीले पवित्र भावनाका साथ उठाएका मुद्दाहरू हाइज्याक र डाइभर्ट गर्ने कामहरू भएका छन्।'
त्यस्तै उनले निर्वाचित संस्था फालेर जेन–जीको नाम भिर्नेहरू मन्त्री माग्न दूतावास धाउन थालेको भन्दै यो एउटा सार्वभौम राष्ट्रका लागि लज्जास्पद विषय भएको बताए।
'यो आन्दोलनले न अधिकार स्थापित गर्यो न लोकतन्त्र र मुलुकको सार्वभौमसत्तालाई बलियो बनाउने काम गर्यो,' उनले भने, 'हरेक आन्दोलन र क्रान्तिहरूले ल्याएका परिवर्तन गौरव गर्न लायक भए पनि जेन–जी पुस्ताको आन्दोलनपछि भएको हिंसात्मक गतिविधि कुनै कोणबाट पनि देशको हितमा छैनन्।'
नागरिक सरकार गठन, सेनापतिसँग वार्ता, प्रतिनिधिसभा विघटन, मन्त्रीका लागि विदेशी संस्था र दूतावासहरूमा खुलेआम धाउन थालेका घटनाक्रमले जेन–जीले गरेको पवित्र आन्दोलनको मानमर्दन गरेको मुख्यमन्त्री कँडेलले आरोप लगाए।
'जेन–जी आन्दोलनलाई आफूअनुकूल हाइज्याक गरिएका घटनाहरू सार्वजनिक हुँदै छन्,' मुख्यमन्त्री कँडेलले भने, 'जेन–जी आन्दोलनका नाममा भएका आगजनी र तोडफोडले मुलुकलाई दीर्घकालसम्म नोक्सान पुर्याउने निश्चित छ।'
नेकपा एमाले स्थायी कमिटी सदस्य समेत रहेका कँडेलले जेन–जी आन्दोलनलाई चुनौतीका रूपमा लिँदै पार्टी विस्तारमा लाग्न कार्यकर्तालाई आग्रह पनि गरे।
'यो नेतृत्व स्थापित हुने अवसर पनि हो। जनतामाझ जानुस्। आफ्नो कुरा राख्नुस्। जनताबाट सुझाव पनि लिनुहोस्,' उनले भने, 'त्यसको मूल्यांकन पार्टी पद्धतिबाटै हुन्छ। नेतृत्वका कमीकमजोरी पार्टी कमिटीमै राख्नु उचित हो।'
भेलामा एमाले प्रदेश अध्यक्ष गुलाबजंग शाहले संकटको बेला नेतृत्वमाथि प्रहार गरेर पार्टीको हित नहुने बताएका थिए।
'नेतृत्वका कमजोरी हुन सक्छन् तर मुलुकको सार्वभौमसत्ता रहने कि नरहने, संघीय लोकतान्त्रिक गणतन्त्र रहने कि नरहने परिस्थिति सिर्जना भएको अवस्थामा नेतृत्वको रक्षा गर्दै अघि बढ्नुपर्छ,' शाहले भने, 'विचलित नभई कार्यकर्ता माझ जानुपर्छ, के–के कुरामा सच्चिने, कसरी सच्चिने त्यो विधि हामी आफै तय गर्न सक्छौं। अहिले निराश हुने बेला होइन।'
जनसंगठन समन्वय संयन्त्रका संयोजक एवं पार्टी प्रदेश कमिटी उपाध्यक्ष टेकराज पछाईले पछिल्लो परिस्थितिमा कर्णालीमा पार्टी थप एकताबद्ध भएर अघि बढाउन सबैलाई आग्रह गरे।
भेलामा विभिन्न जनसंगठनका पदाधिकारीले बदलिँदो परिस्थितिमा पार्टी नेतृत्वले लिनुपर्ने रणनीतिबारे सुझावहरू दिएका थिए।
-1746009348.jpg)
