राष्ट्रिय स्वतन्त्र पार्टी (रास्वपा) सांसद असिम साहले देशमा लुटकाने सिन्डिकेट खडा भएको बताएका छन्।
आइतबार प्रतिनिधि सभा बैठकमा बोल्दै सांसद साहले एक महिनादेखि यो सदनमा राजनीतिक नाटक मञ्चन भएको टिप्पणी गरे।
भिजिट भिसा प्रकरणमा गृहमन्त्री रमेश लेखकमाथि छानबिन हुनुपर्ने माग गर्दै आज पनि रास्वपाले प्रतिनिधि सभामा वेल घेराउ र नाराबाजी गरेको थियो।
त्यसअघि रास्वपा सांसद साहले बोलेका थिए।
‘एक महिनादेखि यो सदनमा राजनीतिक नाटक मञ्चन भइरहेको छ। त्यसको दर्शक बनाइएको छ।स तर यो सदन केवल बहुमतको अंकगणितले होइन, विवेक र नैतिकताले चल्नुपर्छ,’ उनले भने, ‘आज लाखौं युवा रोजगारीको खोजीमा मरुभूमिमा पसिना बगाइरहेका छन्। यो उनीहरूको रहर होइन, यो देश हाँक्नेहरूको असफलताले जन्माएको राष्ट्रिय विवशता हो।’
यही विवशताको भुइँमा टेकेर देशमा लुटको संगठित सिन्डिकेट खडा भएको उनले आरोप लगाए। यो सिन्डिकेटको ‘प्रोडक्ट क्याटलग’ पनि गजबकै रहेको उनको कटाक्ष थियो।
‘कहिले भुटानी शरणार्थीको भेषमा आफ्नै देशको नागरिक बेच्छ, कहिले ललिता निवास बचाउनु पर्नेले सरकारी जग्गा पचाउँछ, कहिले क्विन्टलका क्विन्टल सुनलाई बिस्कुट भनेर भित्र्याउँछ, कहिले वाइडबडी उडाउने नाममा राज्यको ढुकुटी उडाउँछ, कहिले एयरपोर्ट बनाउने नाममा भ्रष्टाचारको ओलम्पिकमा नयाँ कीर्तिमान कायम गर्छ, लाग्छ यो देश अब चाँडै भ्रष्टाचारको म्युजियम बन्दैछ,’ उनले भने।
अब यो ‘बेस्ट–सेलर’ सूचीमा भिजिट भिसा प्रकरण नयाँ अध्यायका रूपमा थपिएको उनले बताए। यो सामान्य ठगी नभएको उनको जिकिर थियो।
‘यो हजारौं नेपाली युवाको सपना, परिवारको सम्पत्ति, र सिंगो भविष्यमाथिको सुनियोजित डकैती हो। लाखौं असुलेर, रोजगारी दिने झुटो सपना देखाएर, युवालाई विदेशी भूमिमा अलपत्र पार्ने यो अपराध संगठित मानव तस्करी हो,’ उनले भने।
अनि यस्तो मुद्दामा तत्काल निष्पक्ष छानबिन नगरेर सरकार मूक दर्शक बन्दा देशमा सरकार होइन, सर्कस चलिरहेको छ जस्तो लाग्ने पनि उनले टिप्पणी गरे।
‘यस्तो अवस्थामा राज्य मूकदर्शक बनेर बसनु हुदैन। छानबिन गर्नैपर्छ। राज्यको प्रमुख दायित्व त्यसको जरोसम्म पुग्नु हो। मानव तस्करीको गहिराइमा पुग्न, सफ्टवेयरमार्फत् घुसको २० भाग खाने हरेक पात्रलाई कठघरामा उभ्याएर सजाय दिने र पीडितलाई न्याय दिन एक उच्चस्तरीय र निष्पक्ष संसदीय छानबिन समिति गठन हुनैपर्छ,’ उनले भने, ‘यसका लागि उच्चस्तरीय संसदीय छानबिन समिति तत्काल गठन गरियोस्।’
कुनै बेला अहिलेका गृहमन्त्रीले ‘प्रतिनिधि सभामै ‘कुनै मन्त्रीमाथि प्रश्न उठे, नैतिकताको आधारमा राजीनामा दिनुपर्छ’ भनेको पनि स्मरण गराए।
‘आज त्यो प्रश्न तपाईंमाथि उठेको छ। अब उपदेश होइन, आचरण देखाउने समय हो। नत्र इतिहासले तपाईंलाई ‘काफिला लुटिँदा मौन बस्ने कायर रहबर’ का रूपमा सम्झिनेछ,’ उनले भने।
