प्रतिनिधि सभामा बजेटमाथि सोमबार पनि छलफल चलिरहेको छ।
भिजिट भिसा प्रकरणमा गृहमन्त्री रमेश लेखकमाथि छानबिन हुनुपर्ने भन्दै राष्ट्रिय स्वतन्त्र पार्टीले वेल घेराउ गर्दै नाराबाजी गरिरहेको छ।
रास्वपा सांसदहरूले आजको बैठकको सुरूमा केहीबेर वेल घेराउ र नाराबाजी गरेका थिए। अहिले भुइँमा पलेँटी कसेर बसिरहेका छन्।
सत्तारूढ नेकपा (एमाले) का सांसद सूर्य थापाले यसप्रति नियमापत्ति गरे। प्रतिनिधि सभा सञ्चालन २०७९ को दफा २० देखाउँदै उनले नियमापत्ति गरे।
उनले नियमापत्ति जनाइरहँदा रोस्ट्रममा माओवादी केन्द्रका सांसद शक्ति बस्नेत बोलिरहेका थिए।
‘नियमावली २० अन्तर्गत मैले नियमापत्ति गर्नुपर्ने महसुस भयो। हामी बजेटमाथिको छलफलमा छौं। यो छलफलका क्रममा बैठक कसरी चल्नुपर्ने हो। कस्तो वातावरण बनाउनुपर्ने हो। हामी सबै सदस्यहरूले कस्तो मर्यादा पालन गर्नुपर्ने हो, कस्तो मर्यादाका बीचमा बैठक सञ्चालन गर्नुपर्ने हो भनेर ध्यानाकर्षण गराउन चाहन्छु,’ उनले भने।
‘हामी रत्नपार्कमा छौं कि, सहिदगेटमा छौं कि, कलंकीमा छौं कि, पोखरा चिप्लेढुंगामा छौं!मैले बुझ्न पाइनँ। बुझ्न सकिनँ’ भन्दै उनले रास्वपा सांसदहरूलाई कटाक्ष गरे।
‘माननीय सदस्यहरूका कुर्सी रोइराखेका छन्। कुर्सीले माननीय सदस्यहरूलाई भेट्न पाएका छैनन्,’ थापाले भने।
थापाले यसो भनेपछि रास्वपाको सांसदहरूले प्रतिवाद गरेका थिए।
