नेपाली कांग्रेसका नेता शेखर कोइरालाले गृहमन्त्री रमेश लेखकलाई पदबाट राजीनामा गर्न सुझाव दिएका छन्।
शनिबार गृहनगर विराटनगरमा पत्रकारहरूसँगको कुराकानीमा नेता कोइरालाले गृहमन्त्री लेखक मुछिएको प्रकरणमा पद छाडेर छानबिनका लागि मार्गप्रशस्त गर्नुपर्ने बताएका हुन्।
''उहाँ संलग्न नहुनुहोला तर रमेशजीबारे जुन कुरा आएको छ, उहाँले नैतिकताको आधारमा छोड्दा हुन्छ। त्यसले मोरल स्टेटस देखिन्छ,' कोइरालाले भने, 'उहाँले म छोडिदिन्छु छानबिन गर भने हुन्छ।'
कोइरालाले मन्त्री नै मुछिएका यस्ता घटनामा विगतमा सम्बन्धित मन्त्रीले राजीनामा दिएको नजिरसमेत सुनाए।
'यस्ता घटनाहरु घट्दा मन्त्रीले राजीनामा दिएर छानबिन समिती बनाएर अघि बढेको सबैलाई थाहा छ,' उनले भने, 'डा. रामशरण महतले डलर केसमा, जनार्दन शर्माले, अरु दुई जना त फेरि फर्कनु पनि भएन। गोकुल बास्कोटा र शेरबहादुर तामाङ। यदि यो हो भने मोरल ग्राउन्डमा उहाँले पनि छोडिदिँदा हुन्छ। इस्यु आइसकेपछि क्लिन छु भन्ने देखाउन छानबिन गर्नुपर्छ।'
अध्यागमन कार्यालयका कर्मचारीले ठूलो रकम लिएर मानिसलाई विदेश पठाउन सहजीकरण गरेको विषयमा गृहमन्त्री रमेश लेखक पनि विवादमा तानिएका छन्।
यस विषयमा अख्तियार दुरूपयोग अनुसन्धान आयोग टंगालले अनुसन्धान थालेपछि गृह मन्त्रालयले बिहीबार अध्यागमन कार्यालय त्रिभुवन अन्तर्राष्ट्रिय विमानस्थलका ८ जनालाई सरूवा गरेको थियो।
अध्यागमन विभागमा रहेका नासुहरू प्रेमप्रसाद पौडेल र वीरभद्र जोशीको काठमाडौं जिल्ला प्रशासन कार्यालयमा र नासु नरबहादुर थापालाई जिल्ला प्रशासन कार्यालय बाँके सरूवा गरिएको थियो।
त्यस्तै, सहायक कम्प्युटर अपरेटर कमला श्रेष्ठ, कम्प्युटर अपरेटरहरू उदेन सुवेदी, प्रदीपकुमार यादव, पवन गुरूङ र धनराज उपाध्यायको कारागार व्यवस्थापन विभाग वा अन्तर्गतमा सरूवा गरिएको थियो।
त्यस्तै अन्य ६ जनालाई पनि गृहले अध्यागमनबाट तानेको थियो। यसअघि गृहले अध्यागमन प्रमुख तीर्थराज भट्टराईको जिम्मेवारी खोसेर गृहमा तानेको थियो। योसँगै गृहले अध्यागमन कार्यालयबाट १५ जनाको सरूवा गरिसकेको छ।
अध्यागमन कार्यालयले बिचौलियाको सेटिङमा रकम असुली गरी भिजिट भिसामा पठाउन सहजीकरण गरिदिएको घटनामा अख्तियारले अनुसन्धान थालेपछि गृहले ठूलो संख्यामा कर्मचारी हेरफेर गरेको थियो।
-1742801159.jpg)
