विश्वका धनाढ्य इलन मस्कले अब राजनीतिमा अत्यन्त कम पैसा खर्च गर्ने बताएका छन्।
करोडौं डलर खर्च गरेर डोनाल्ड ट्रम्प र रिपब्लिकन उम्मेदवारलाई चुनाव जिताएका टेस्लाका मालिक मस्कले अब राजीनीतिमा धेरै पैसा खर्च नगर्ने बताएका हुन्।
'राजनीतिक खर्चको सन्दर्भमा, म भविष्यमा धेरै कम गर्नेछु,' कतार इकोनोमिक फोरममा ब्लुमबर्गकी पत्रकार मिशल हुसेनसँगको कुराकानीमा मस्कले भने।
हुसेनले मस्कलाई त्यसको कारण पनि सोधकी थिइन्।
जबाफमा मस्कले राजनीतिमा गर्नुपर्ने जति खर्च गरिसकेको बताए।
'मैले पर्याप्त गरिसकेको छु भन्ने लाग्छ। यदि मैले भविष्यमा राजनीतिमा खर्च गर्नुपर्ने कारण देखेँ भने गरौंला तर त्यस्तो हुन्छ भन्ने म देख्दिनँ,' उनले भने।
अमेरिकी मिडिया सिएनएनका अनुसार गत अप्रिलमा विस्कन्सिन सर्वोच्च अदालतको न्यायाधीशको चुनावमा मस्कले समर्थन गरेका उम्मेदवार पराजित भएका थिए।
त्यहाँ रूढिवादी उम्मेदवार ब्राड शिमेल उदारवादी उम्मेदवार सुसान क्रफर्डसँग हारेका थिए। त्यतिबेला मस्कले २ करोड डलर खर्च गरेको सिएनएनले लेखेको छ।
गत नोभेम्बरमा भएको राष्ट्रपति चुनावमा मस्क खुलेर ट्रम्पलाई जिताउन लागेका थिए। उनले किनेको एक्स (पहिले ट्वीटर) समेत ट्रम्पलाई जिताउन चुनाव प्रचारमा प्रयोग गरेका थिए।
चुनावको प्रचार प्रसारताका मस्कले ट्रम्प र रिपब्लिकन उम्मेदवारहरूलाई जिताउन २९ करोड डलरभन्दा बढी खर्च गरेको सिएनएनले जनाएको छ।
ट्रम्पले आफूलाई राष्ट्रपति जिताउन प्रमुख भूमिका खेल्ने मस्कलाई ह्वाइट हाउसमा सरकारी दक्षता विभाग (डोज) स्थापना गरेर त्यसको प्रमुख बनाएका छन्।
यद्यपि मस्कले अब डोजमा पनि आफ्नो सक्रियता घटाउने भनेका छन्।
उनले अब आफ्नो व्यवसायमा बढी ध्यान दिने र कम समय ह्वाइट हाउसमा बिताउने भनेका थिए।
पत्रकार हुसेनले ट्रम्पलाई राष्ट्रपति जिताएपछि उनलाई प्रभावमा पारेर मस्कले व्यापक फाइदा लिएको चर्चाबारे पनि प्रश्न गरेकी थिइन्।
जबाफमा मस्कले रिसाएर उत्तर दिएका थिए।
'म आफै शक्तिमा छैन। डोजमा रहेर मैले राष्ट्रपतिलाई सल्लाह दिने हो। उहाँले मान्न पनि सक्नुहुन्छ। नमान्न पनि सक्नुहुन्छ। मैले दिएको सल्लाह मान्नु नै हुन्छ भन्ने निश्चित हुँदैन,' मस्कले हुसेनको प्रश्नमा जबाफ दिए।
उनले आफूले सरकारबाट कुनै पनि किसिमको ठेक्का वा परियोजना पाएको खण्डमा त्यो गोप्य नहुने र ठूला ठूला हेडलाइनमा समाचार बन्ने उनले बताए।
