प्रधानमन्त्री केपी शर्मा ओलीले कुनै पनि जेठ १५ गते राजावादीको सपना साकार नहुने बताएका छन्।
प्रतिनिधि सभाको आइतबारको बैठकमा प्रधानमन्त्री ओलीले लोकतन्त्र, संविधानभित्र रहेर कुरा गर्न सिक्न राजावादीलाई आग्रह गरेका हुन्।
‘अधिनायकवादी प्रणाली हुँदा, निरङ्कुश प्रणाली हुँदा, संविधान, कानुनको दुहाइ दिएर माइक फुट्नेगरी कराउने साथीहरू आज खुलेआम लोकतान्त्रिक प्रणालीभित्र लोकतन्त्र उल्ट्याउने शंखघोष गर्नुहुन्छ र देशलाई प्रतिगमनमा लाने कुरा गर्नुहुन्छ। जेठ १५ गते, यसपटकको जेठ १५ गते होइन अब आउने कुनै पनि जेठ १५ गते पर्खिनुस्, तपाईंको सपना साकार हुनेछैन,’ आइतबार प्रतिनिधि सभामा नीति तथा कार्यक्रममाथि सांसदहरूले उठाएका प्रश्नमा जबाफ दिनेक्रममा प्रधानमन्त्री ओलीले भने।
नवराज सुवेदी नेतृत्वमा जेठ १५ गतेदेखि राजावादीहरूले 'जनआन्दोलन' गर्ने घोषणा गरेका छन्।
उक्त घोषणाप्रति लक्ष्य गर्दै प्रधानमन्त्री ओलीले प्रतिगामी सपना काम नलाग्ने र यसमा जोड नगर्न राजावादीहरूलाई आग्रह गरे। उनले समयलाई चिन्न पनि आग्रह गरे।
‘समयलाई चिनौं, समयानुसार अघि बढौं बंगलादेश बनाउँछौं भन्ने! बंगलादेशमा पनि बितेको राजा त फर्काएनन् त, त्यहाँ पनि राजा थिए नि एकपटक! श्रीलंकामा पनि राजा फर्काएको होइन। लोकतन्त्रभित्रको कुरा हो। लोकतन्त्र, संविधान, प्रणाली र शान्तिपूर्ण राजनीति भित्रको कुरा गर्न सिके हुन्थ्यो!,’ उनले भने।
सुवेदी नेतृत्वको 'संयुक्त जनआन्दोलन समिति' ले राजसंस्था र हिन्दु राष्ट्र पुनर्स्थापना, संघीयता खारेजीलगायत एजेन्डामा जेठ १५ गतेदेखि अनिश्चितकालीन आन्दोलन गर्न लागेका छन्।
यो पनि: पहिला नमानेका राजावादीहरू नवराज सुवेदीकै नेतृत्वमा एकत्रित हुन कसरी भए सहमत?
