नेकपा (माओवादी केन्द्र) का अध्यक्ष पुष्पकमल दाहाल प्रचण्ड बाथरूममा लडेर घाइते भएपछि बुधबार पाँचथरमा हुने माओवादीको जनसभा रोकिएको छ।
पाँचथरको फिदिममा बुधबार हुने जनसभालाई प्रचण्डले सम्बोधन गर्ने कार्यक्रम थियो। माओवादी नेता इन्द्र आङ्बोले बुधबारको कार्यक्रम शनिबारलाई सारिएको जानकारी दिएका छन्।
‘यहि वैशाख २५ गते फिदिम बजारमा अध्यक्ष प्रचण्डको उपस्थितिमा हुने जनसभा वैशाख २७ गते शनिबार हुने भएको छ’, आङ्बोले भनेका छन्।
प्रचण्ड मंगलबार मध्यरातमा ललितपुरको लाँकुरी भञ्ज्याङस्थित टेरेस रिसोर्टमा लडेर घाइते भएका थिए।
छोरी–ज्वाइँ र केही नजिकका आफन्तसहित मंगलबार साँझ लाँकुरी भञ्ज्याङको रिसोर्ट पुगेका उनी त्यहाँ रात बिताउने गरी गएका थिए।
प्रचण्ड मंगलबार मध्यराति लडेको र तुरून्तै मेडिसिटी ल्याइएको उच्च स्रोतले जानकारी दियो।
प्रचण्डको टाउकामा तीनवटा टाँका लगाइएको छ भने उनको स्वास्थ्यावस्था सामान्य रहेको अस्पताल स्रोतले जानकारी दियो।
