नेकपा (एमाले) का सांसद योगेश भट्टराईले केपी शर्मा ओली नेतृत्वको सरकारले एउटा कर्मचारी हटाउँदा प्रमुख प्रतिपक्षी दलका नेता पुष्पकमल दाहाल 'प्रचण्ड' लाई मुटुमै गोली लागेकोजस्तो भएको टिप्पणी गरेका छन्।
प्रतिनिधि सभाको मंगलबारको बैठकमा बोल्दै सांसद भट्टराईले नेपाल विद्युत प्राधिकरणका कार्यकारी निर्देशकबाट कुलमान घिसिङलाई सरकारले हटाएको प्रसंगतर्फ लक्ष्य गर्दै यसले प्रचण्डलाई मुटुमै गोली लागेकोजस्तो भएको बताए। तर भट्टराईले कुलमान घिसिङको नाम भने लिएका थिएनन्, सहसचिवस्तरको एक कर्मचारी भनेका थिए।
‘केपी ओली सरकारले एउटा सहसचिवलाई हटाएकोमा यति ठूलो चिन्ता, तपाईंको मुटुमै गोली लागेजस्तो किन भएको छ?,’ प्रचण्डप्रति लक्ष्य गर्दै उनले भने, ‘यो त मुटुमै गोली लागेकोजस्तो भएको छ के उहाँलाई।’
यो कुरा प्रधान सेनापति वा मुख्य सचिव हटाएजस्तो नभएको पनि भट्टराईले बताए।
‘प्रधान सेनापति हटाएजस्तो र मुख्य सचिवलाई जगेडामा लगेर राखेजस्तो कुरा त होइन त्यो,’ उनले भने, ‘यस्ता खालका बेथितीहरू आफ्ना कार्यकालमा धेरै भएका छन्, एकपटक सम्झनुहोला।’
शिक्षक, कर्मचारीलगायतलाई पनि प्रतिपक्षी दल नेता प्रचण्डले उक्साउने काम गरेको उनको भनाइ छ।
यो पनि: मानिसमा भ्रम छर्न प्राधिकरणले श्वेतपत्र ल्यायो– कुलमान घिसिङ
-1746513231.jpg)
