नेकपा (एमाले) ले आजको दिन (वैशाख ११) लाई जनताले जितेको दिन भन्दै युथ सेलिब्रेसन गर्दैछ।
पछिल्लो समय पार्टी कमिटीमा क्लस्टर नै छुट्टयाएर युवा सहभागिता बढाउँदै आएको एमालेले बिहीबार एक लाख युवा भृकुटीमण्डप उतार्ने दाबी गरेको छ।
आजको युथ सेलिब्रेसनमा ४० वर्षमुनिका युवा नै वक्ता राखिने राष्ट्रिय युवा संघ नेपालका अध्यक्ष क्षितिज थेवेले जानकारी दिए। थेवे कार्यक्रमका संयोजक पनि हुन्।
एमालेले आजको दिन युथ सेलिब्रेसनका रूपमा मनाउन झन्डै एक महिनादेखि तयारी थालेको थियो। महासचिव शंकर पोखरेलले आफै यसको संयोजन गरेका थिए। यहाँसम्मकी मञ्चमा बोल्ने वक्ताहरूको बुधबार रिहर्सलसमेत महासचिव पोखरेल आफैले गरेका थिए।
भृकुटीमण्डपमा युवालाई आकर्षित गर्न एमालेले विभिन्न कलाकार तथा सांगीतिक ब्यान्डहरूलाई समेत मञ्चमा प्रस्तुत गर्ने भएको छ।
एमालेले आज शान्ता रानी परियार, एलिना चौहान, पूर्ण राई एण्ड दाजुभाइहरू मञ्चमा उतार्न लागेको हो।
त्यस्तै युवा पुस्तामाझ निकै रुचाइएका वाङदेन शेर्पा एन्ड द काउब्वाइज, द एलिमेन्ट्स, सुशान्त एन्ड रागा समेतले बिहीबार प्रस्तुति दिने कार्यक्रममा संयोजक क्षितिज थेवेले जानकारी दिए।
‘समाजमा व्याप्त नकारात्मकता चिर्न र केही भएको छैन भन्ने भाष्य चिर्न हामीले युथ सेलिब्रेसन आयोजना गरेका हौं। वक्तादेखि प्रस्तुतिसम्म युवाहरूकै हुनेछ,’ थेवेले भने, ‘वैशाख ११ जनताले जितेको दिन हो, अब देश हामीले नै बनाउनेछौं भन्ने सन्देश प्रवाह गर्न पनि युथ सेलिब्रेसन जरूरी ठान्यौं।’
उनले कार्यक्रममा खानाका स्टलदेखि विभिन्न झाँकीसम्म प्रस्तुत गरिने बताए।
‘उत्सवममा युवा आकर्षणका विविधि आयामहरू समावेश हुनेछन्,’ उनले भने।
आजको उत्सवमा युवा उतार्न एमालेले क्लस्टर नै छुट्टयाएर मातहतका कमिटीलाई निर्देशन दिएको थियो।
एमालेले वडा, पालिका कमिटीमा ३३ प्रतिशत युवा अनिवार्य गरेको छ। वैशाख ११ गते कमिटीमा भएका ती युवालाई अनिवार्य उपस्थित गराउन निर्देशन दिएको छ।
त्यस्तै जिल्ला कमिटीमा १५ र प्रदेश कमिटीमा १० प्रतिशत युवा निर्वाचित भएका छन्। जिल्ला र प्रदेश कमिटीमा रहेका सबै युवालाई अनिवार्य आउन पार्टी महासचिव शंकर पोखरेलले निर्देशन पठाएका छन्।
स्थानीय जनप्रतिनिधिहरू मेयर, उपमेयर, पालिका अध्यक्ष, उपाध्यक्ष र वडा अध्यक्ष सबैलाई वैशाख ११ गते काठमाडौं आउन भनिएको छ।
बागमती प्रदेशको हकमा भने अलग्गै निर्देशन छ।
२०७९ को स्थानीय, प्रदेश र प्रतिनिधिसभामा पार्टीका तर्फबाट उमेद्वार भएका समेतलाई युवा महोत्वसमा सहभागी हुन निर्देशन दिइएको छ।
जनसंगठनहरूका केन्द्रीय कमिटीका सदस्यहरू र सबै महासंघहरूको घटक संगठनमा आबद्ध सदस्यहरूलाई पनि अनिवार्य उपस्थित हुन भनिएको एमालेले बताएको छ।
सम्पर्क मञ्चका सबै तहका कमिटीमा आबद्ध ४० वर्षमुनिका युवालाई पनि सहभागिताको निम्ति निर्देशन दिइएको छ।
युवाहरूलाई काठमाडौं ल्याउने र लैजाने कार्यको संयोजन गर्न पार्टी जिल्ला अध्यक्षहरूलाई निर्देशन दिइएको परिपत्रमा उल्लेख छ।
कतिपय वडामा तोकिएको युवा संख्या कथम कदाचित पुगेन भने सम्बन्धित पालिकाको अन्य वडाबाट पूर्ति गर्न सकिने तर तोकिएको कूल संख्यामा घटाउन नमिल्ने एमालेको निर्देशन छ।
‘मुलुकलाई अस्थिरतामा लैजान खोज्ने दशकौंको बलिदानी संघर्षबाट प्राप्त संघीय लोकतान्त्रिक गणतन्त्रलाई चुनौती दिने, जनताका अधिकार खोस्न खोज्ने तत्त्वलाई फेरि टाउको उठाउन नसक्ने गरी पराजित गर्न, युवालाई लोकतन्त्रप्रतिको गौरवबोध गराउन उपरोक्त कार्यक्रममा योजनाबद्ध रूपमा सक्रिय सहभागिताका लागि संयोजन र कार्यान्वयन गर्न÷गराउनुहुन निर्देशन गरिन्छ,’ महासचिव पोखरेलले परिपत्रमा भनेका छन्।
-1745464654.png)
