राष्ट्रिय प्रजातन्त्र पार्टी (राप्रपा)का सांसद राजेन्द्र लिङ्देनले सरकारले अधिकार खुम्च्याउँदै गएकाले निषेधित क्षेत्रमा प्रदर्शन गर्नुपरेको बताएका छन्।
आइतबार संसदीय दल कार्यालयबाट बाहिर निस्किएर सञ्चारकर्मीसँग प्रतिक्रिया दिँदै निषेधित क्षेत्र तोड्नुको कारण बताएका हुन्।
‘सरकारले बोल्न पाउने, लेख्न पाउने, प्रदर्शन गर्न पाउने, स्वभाविक अधिकारलाई खुम्च्याउँदै लगेको छ। र जनताबाट सरकार झन् झन् टाढा हुँदै जाने अवस्था सिर्जना गरेको छ,’ उनले भने, ‘त्यसैले सरकारको नजिकै गएर प्रदर्शन गरौं भनेर हामीले प्रतिकात्मक रूपमा कार्यक्रमको आयोजना गरेका छौं।’
उनले आफूहरूको आवाज सरकारले सुन्नुपर्ने बताएका थिए।
उनले राप्रपाका वरिष्ठ उपाध्यक्ष रविन्द्र मिश्र र महामन्त्री एवं सांसद धवलशमशेर राणाको रिहाइको माग समेत गरे।
उनले सञ्चारकर्मीसँग छोटो प्रतिक्रिया जनाएपछि सिंहदरबार गेट नजिकै नाराबाजी समेत गरेका थिए। त्यसपछि प्रहरीले लिङ्देन र ज्ञानेन्द्र शाहीलाई नियन्त्रणमा लिएको हो।
यस्तै, सिंहदरबारभित्रै पक्राउ परेपछि लिङ्देनले निरंकुश सरकारले यही गर्ने बताएका थिए।
'निरंकुश सरकारले गर्ने यही काम हो,' पक्राउ परेपछि लिङ्देनले भने, 'यसमा हामीले अचम्म मान्नुपर्ने कारण छैन। हामी सबै थुनिन तयार छौं।'
-1745138001.jpg)
