राष्ट्रिय स्वतन्त्र पार्टी (रास्वपा) ले राष्ट्र निर्माणसम्बन्धी खाका तयार गर्न उपसभापतिद्वय डोलप्रसाद अर्याल (डिपी) र स्वर्णिम वाग्लेको संयोजकत्वमा कार्यदल बनाएको छ।
सोमबार बसेको केन्द्रीय समिति बैठकले पूर्वमन्त्रीहरू सुमना श्रेष्ठ, शिशिर खनाल, विराजभक्त श्रेष्ठ र डा. तोसिमा कार्की सदस्य रहेको कार्यदल गठन गरेको कार्यवाहक प्रवक्ता मनिष झाले जानकारी दिए।
‘पार्टीको तर्फबाट राष्ट्रनिर्माण सम्बन्धी खाका तयार गर्न उपसभापतिद्वय डोलप्रसाद अर्याल र स्वर्णिम वाग्लेको संयोजकत्वमा पूर्वमन्त्रीहरू सुमना श्रेष्ठ, शिशिर खनाल, विराजभक्त श्रेष्ठ र डा. तोसिमा कार्की सम्मिलित मिसन ब्लुप्रिन्ट कार्यदल गठन गरिएको छ,’ उनले भने।
त्यस्तै बैठकले लिडरसिप एकेडेमी र उम्मेदवार क्लबको कार्यान्वयनका लागि सहमहामन्त्रीद्वय सुमना श्रेष्ठ र विपिनकुमार आचार्यलाई जिम्मेवारी तोकिएको उनले बताए।
यसैबीच चैत २३ गतेदेखि रास्वपाले चितवनबाट जनयात्रा सुरू गर्दैछ। प्रथम परिषद्को राष्ट्रिय भेलामा घोषणा गरेअनुरूप जनताको कुरा सुन्ने यात्रा, जनयात्राको सुरू गर्न लागिएको मनिष झाले बताए।
पार्टीको जनयात्रा कार्यक्रमको कार्यविधि लगायतको संयोजन जिम्मेवारी संसदीय दलका उपनेता विराजभक्त श्रेष्ठलाई तोकिएको उनले बताए।
सभापति रवि लामिछानेले पार्टीको पहिलो महाधिवेशन वैशाखमै सम्पन्न गर्न पार्टी सभापतिबाट निर्देशन दिएका थिए। रास्वपाले वैशाख २५, २६, २७ गते पहिलो महाधिवेशन गर्दैछ।
‘महाधिवेशन आयोजना गर्ने सन्दर्भमा केन्द्रीय समितिका सदस्यहरू र प्रदेश समितिबाट आगामी तीन दिनभित्र लिखित राय र कार्य विवरण पार्टीमा पेस गर्न निर्देशन दिइएको छ,’ उनले भने।
-1742801159.jpg)
