प्रधानमन्त्री केपी शर्मा ओलीले नचाहिएको विषयमा अत्तो थापेर विपक्षीबाट सदन अवरूद्ध गरिएको बताएका छन्।
महिला उद्यमी महासंघको आठौं अन्तर्राष्ट्रिय महिला उद्यमी व्यापार मेलाको बिहीबार उद्घाटन गर्दै प्रधानमन्त्री ओलीले गैह्रविषयलाई सदन अवरूद्ध पारिएको बताए। सरकारको एउटा निकायको कर्मचारी हेरफेरको विषयलाई लिएर सदन अवरुद्ध गर्न नहुने पनि उनले बताए।
उनले यही चैत १८ गतेभित्र अध्यादेशहरूलाई प्रतिस्थापन गर्ने विधेयक पारित गर्ने स्थितिमा त्यसलाई प्रभावित पार्न सदन अवरूद्ध गरिएकामा चिन्ता गरे।
‘वर्षौंसम्म त्यही निकायमा कामा गरेको मान्छेलाई जिम्मेवारी दिइँदा प्रशंसा गर्नुपर्ने त्यो गरिको छैन। प्रशंसा नगर्नुपर्नेलाई झुठा प्रशंसा गरिएको छ। गाली नगर्नुपर्नेलाई झुठा गाली गरिएको छ,’ प्रधानमन्त्री ओलीले भने, ‘आन्दोलनका नाममा के–के हुँदैछ भनेर आतंक सिर्जना गर्न खोजिएको छ। चैत १५ गते काठमाडौंका दुई स्थानमा जुलुस र सभा हुन्छ। सकिन्छ। हुने त्यत्ति हो। तीललाई पहाड बनाउनुपर्ने केही छैन।’
प्रधानमन्त्री ओलीले औपनिवेशिक र सामन्तवादी स्थितिले सिंगै नेपाली समाज पछाडि परेको र त्यसमा पनि महिलाहरूलाई झन् पछाडि पारिएको स्थितिमा संघर्ष र बलिदानको परिणामबाट समाज परिवर्तन र विकासको यात्रामा अघि बढेको बताए।
उनले पञ्चायतकालमा निकै पछाडि परेको मुलुक अहिले चौतर्फी विकासको क्रममा अघि बढिरहेको बताए। खासगरी आफूले सरकारको नेतृत्व गरेका समयमा ठूला र रणनीतिक महत्त्वका आयोजना अघि बढेकाले निराश हुनुपर्ने अवस्था नरहेको बताए।
कार्यक्रममा समाजसेवी अनुराधा कोइराला लगायतलाई प्रधानमन्त्रीबाट सम्मान गरिएको थियो। बिहीबारदेखि चैत १८ गतेसम्म चल्ने मेलामा महिला उद्यमीद्वारा उत्पादित नेपाली वस्तुहरूको प्रर्दशनी राखिएको छ।
