प्रमुख तीन दलका शीर्ष नेताहरूको बैठक सोमबार अपराह्न बस्दैछ।
संक्रमणकालीन न्यायसम्बन्धी विषयमा छलफल गर्न नेकपा (एमाले) का अध्यक्ष तथा प्रधानमन्त्री केपी शर्मा ओली नेपाली कांग्रेसका सभापति शेरबहादुर देउवा र प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ बस्दैछन्।
प्रमुख तीन दलका नेता यसअघि नै छलफलमा बस्न खोजेका थिए। तर माओवादी केन्द्रले हुलाकी राजमार्गकेन्द्रित ‘तराई–मधेस जागरण अभियान’ चलाइरहेकाले सम्भव भएको थिएन।
सोमबार अपराह्न चार बजे छलफलमा बस्ने गरी खबर आएको प्रचण्डका प्रेस सल्लाहकार गोविन्द आचार्यले जानकारी दिए।
उनका अनुसार शीर्ष नेताहरूबीच संक्रमणकालीन न्यायलगायत विषयमा छलफल हुनेछ।
प्रचण्ड अहिले चितवनको शिवनगरमा छन्। माओवादी केन्द्रको जागरण अभियानका क्रममा चितवन रहेको प्रचण्ड आजै काठमाडौं फर्कने आचार्यले बताए।
संक्रमणकालीन न्यायसम्बन्धी कानुन बने पनि कार्यान्वयनका लागि आवश्यक सत्य निरूपण तथा मेलमिलाप आयोग र बेपत्ता पारिएका व्यक्तिको छानबिन आयोग बन्न सकेको छैन।
संक्रमणकालीन न्यायसँग सम्बन्धित दुवै आयोगमा पदाधिकारी नियुक्ति सिफारिसका लागि सर्च कमिटीसमेत गठन भएको थियो।
उक्त कमिटीले पदाधिकारी सिफारिस नगरी समय गुजारेको थियो।
पूर्वप्रधानन्यायाधीश ओमप्रकाश मिश्र नेतृत्वको त्यस समितिले आवेदन आह्वान गर्ने, सूची बनाउने र आवेदकहरूसँग अन्तर्वार्ता गर्ने लगायतका प्रक्रिया पूरा गरे पनि नियुक्तिका लागि नाम सिफारिस गरेन।
प्रधानमन्त्री ओलीले अग्नि खरेललाई संक्रमणकालीन न्यायसम्बन्धी सल्लाहकार नियुक्त गरेपछि उनले शीर्ष नेताहरूसँग छलफल थालेका थिए।
दुवै आयोगका पदाधिकारी नियुक्तिलगायत अड्किएका विषय टुंग्याउने गरी शीर्ष नेता छलफलमा जुट्न लागेका हुन्।
