नेकपा (एमाले) का अध्यक्ष केपी शर्मा ओलीले पार्टीनिकट प्रेस चौतारी नेपालको अध्यक्षमा गणेश पाण्डे र महासचिवमा चेतन अधिकारीलाई बनाउने तयारी गरेका छन्।
प्रधानमन्त्रीसमेत रहेका ओलीले जनसंगठन प्रमुख भानुभक्त ढकाल, पार्टी प्रचार विभाग प्रमुख राजेन्द्र गौतम, प्रेस चौतारी अध्यक्ष गणेश बस्नेतलगायत नेताहरूलाई केही दिनअघि बालुवाटार बोलाएर प्रेस चौतारीको नेतृत्व सहमतिमा टुंग्याउन निर्देशन दिएका थिए।
‘सबैको बढुवा तथा व्यवस्थापन हुने गरी सहमतिमै नेतृत्व टुंग्याउने छलफल गरेका छौं। त्यहीअनुसार प्रेस चौतारीको आगामी नेतृत्व सहमतिका साथ अघि बढ्छ,’ प्रचार विभाग प्रमुख गौतमले जानकारी दिए।
एक नेताले दिएको जानकारी अनुसार अहिले उपाध्यक्ष रहेका पाण्डेलाई अध्यक्ष बनाउने र अधिकारीलाई महासचिव बनाउन ओलीले निर्देशन नै दिइसकेका छन्।
ती नेताका अनुसार अध्यक्षका अर्का आकांक्षी उपाध्यक्ष राजेश राईलाई प्रचार विभागमा लैजाने तयारी छ।
ओलीको उक्त निर्देशनपछि गणेश पाण्डेले प्रचार विभागको सचिवबाट राजीनामा दिइसकेका छन्। उनले शुक्रबार नै पदबाट राजीनामा पार्टी केन्द्रीय कार्यालयमा दर्ता गराएका छन्। पाण्डे गत फागुन १८ गते सचिवालय बैठकबाट प्रचार विभाग सचिव मनोनीत भएका थिए।
प्रेस चौतारीको दसौं अधिवेशन चैत १० देखि १२ गतेसम्म विराटनगरमा हुँदैछ। चौतारीका नेताहरूले आगामी नेतृत्वका लागि आकांक्षा प्रकट गरिरहँदा पार्टी नेतृत्वले महाधिवेशन सुरू हुनुअगावै अध्यक्ष र महासचिवको टुंगो लगाउने तयारी गरेका छन्।
ओलीले अध्यक्ष बनाउन लागेका लमजुङका पाण्डे वरिष्ठ उपाध्यक्ष ईश्वर पोखरेलनिकट मानिन्छन्। पोखरेल उपप्रधानमन्त्री हुँदा पाण्डे उनको सचिवालयमा थिए।
झापाका अधिकारी भने ओलीनिकट हुन्। उनी ओली यसअघि प्रधानमन्त्री भएका बेला सचिवालयमा थिए।
-1742801159.jpg)
