मंगलबार भएको स्ववियु निर्वाचनमा चितवनको रामपुरस्थित त्रिभुवन विश्वविद्यालयको आंगिक क्याम्पस चितवन इन्जिनियरिङ क्याम्पसबाट स्ववियु अध्यक्षमा स्वतन्त्र उम्मेदवार प्रज्वल अधिकारी निर्वाचित भए। उनी ७८ मत पाएर निर्वाचित हुँदा अनेरास्ववियुका विशाल पोखरेलले ५४ मत प्राप्त गरेका थिए।
यहाँ अध्यक्षमा यी दुई उम्मेदवारमात्रै थिए। जब अधिकारी अध्यक्षमा निर्वाचित भए अनेरास्ववियु क्रान्तिकारीका नेताहरूले चितवन इन्जिनियरिङ क्याम्पसमा आफ्नो संगठनको प्यानलै निर्वाचित भएको दाबी गर्न थाले।
भरतपुर महानगरपालिकाकी मेयर रेनु दाहालले चितवन इन्जिनियरिङ क्याम्पस रामपुरको स्ववियु अध्यक्षमा क्रान्तिकारीका प्रज्वल अधिकारी विजयी भएको भन्दै बधाई दिएकी थिइन्। साँझतिर त अधिकारीसहितको निर्वाचित टिमले माओवादी केन्द्रका अध्यक्ष पुष्पकमल दाहाल‘प्रचण्ड’सँग खिचाएको फोटो नै सामाजिक सञ्जालहरूमा पोष्ट हुन थाले।
त्यतिखरसम्म नेपाली कांग्रेसका नेताहरूले नेविसंघको समर्थनमा स्वतन्त्र उम्मेदवार स्ववियु अध्यक्षमा निर्वाचित भएको भन्दै बधाई दिइरहेका थिए। कांग्रेसका जिल्ला सभापति राजेश्वर खनाल, नेता सूर्यकान्त घिमिरे लगायतले नेविसंघको समर्थनमा स्वतन्त्र उम्मेदवार विजयी भएको भनेर बधाई दिएका थिए।
भरतपुर महानगरपालिका–२३ का वडाध्यक्ष रहेका कांग्रेसका युवा नेता दिपक दवाडीले त नेपाली कांग्रेस आबुखैरेनी वडा नम्बर १ का क्रियाशील सदस्य हरिभक्त अधिकारीका सुपुत्र प्रज्वल अधिकारी स्ववियु अध्यक्षमा निर्वाचित भएको भनेर बधाई दिएका थिए।
दुई राजनीतिक दलका नेताले आफ्नो पार्टीको दाबी गरेर बधाई दिइरहँदा अनेरास्ववियुका नेताहरूले भने स्वतन्त्र व्यक्तिलाई आफ्नो दाबी गरेको भन्दै कटाक्ष गरेका थिए।
अनेरास्ववियु क्रान्तिकारीका केन्द्रीय उपाध्यक्ष कृष्ण सुनार अधिकारी पहिलेदेखि नै अनेरास्ववियु क्रान्तिकारीसँग निकट रहेको दाबी गर्छन्।
उनकाअनुसार अधिकारी र उक्त क्याम्पसको अनेरास्ववियु क्रान्तिकारीका ईकाई अध्यक्ष पुकार खनालबीच घनिष्ट सम्बन्ध छ। उनीहरू एउटै कोठामा बस्ने सुनारले बताए।
‘पहिले स्थगित भएको स्ववियु निर्वाचनमा पनि उनी अध्यक्षका उम्मेदवार थिए। स्वतन्त्र रूपमै उम्मेदवार बन्दा नेविसंघको पनि भोट पाएर जित्न सजिलो हुने भएकाले स्वतन्त्र उम्मेदवारी दिएका हुन्,’ सुनारले दाबी गरे।
उनकाअनुसार अधिकारीले विजयी भएर पार्टी अध्यक्ष प्रचण्डलाई भेट्नुअघि नै अनेरास्ववियु क्रान्तिकारीको सदस्यता लिइसकेका छन्।
नेविसंघ अझै पनि उनी स्वतन्त्र नै रहेको दाबी गर्छ। संघका केन्द्रीय सदस्य राजन दाहालले नेविसंघ एक्लैले जित्ने अवस्था नरहेकाले स्वतन्त्र उम्मेदवारलाई समर्थन गरिएको बताए।
अनेरास्ववियु चितवनका अध्यक्ष हरि आचार्य एक्लै लड्दा जित्ने निश्चित जस्तै रहेकाले अन्य संगठनसँग छलफल नै नगरेको बताउँछन्।
‘तर हार्ने अवस्था आएपछि क्रान्तिकारी र नेविसंघ मिलेर स्वतन्त्र उम्मेदवारलाई समर्थन गरे। जितेपछि सदस्यता लिँदैमा कुनै संगठनको भन्न मिल्दैन। कानुनी रूपमा ऊ स्वतन्त्र नै हो,’ आचार्यले भने।
यस क्याम्पसको स्ववियु सचिवमा अनेरास्ववियु क्रान्तिकारीका सुजन थापा क्षेत्री, कोषाध्यक्षमा क्रान्तिकारीकै राजेश्वर दाहाल निर्वाचित भएका छन्।
सदस्यहरूमा अनेरास्ववियुका प्रतिक्षा न्यौपाने, सुशान्त घिमिरे, प्रवेशकुमार साह, अनेरास्ववियु क्रान्तिकारीका आँचल देवकोटा, विष्णु भट्टराई, प्रितम आले र नेविसंघका कृष्मा श्रेष्ठ निर्वाचित भएका छन्।
समानुपातिकतर्फ अनेरास्ववियुले ५२, अनेरास्ववियु क्रान्तिकारीले ४५ र नेविसंघले ३४ मत ल्याएका थिए। यहाँ १३२ जना विद्यार्थी रहेकोमा २९ जनामात्रै पुरूष छन्।
