नेकपा (एमाले) का चारवटा जिल्ला कमिटीले अझै अधिवेशनको मिति तोकेका छैनन्।
एमालेले अधिवेशन गर्न बाँकी रहेका जिल्ला कमिटीलाई कात्तिक मसान्तभित्र मिति तोकिसक्न असार २६ गते बसेको सचिवालय बैठकले नै निर्देशन दिएको थियो।
तर मधेस प्रदेशका सप्तरी, सिराहा, धनुषा र सुदूरपश्चिमको अछाम जिल्ला कमिटीले केन्द्रले दिएको समयसीमाको पाँच महिना घर्किंदा पनि अधिवेशनको मिति तोक्न नसकेका हुन्।
‘केन्द्रले अधिवेशन गर्न दिएको समयसीमा सकिइसकेको छ। तर धनुषा, सिराहा, सप्तरी र अछाम जिल्ला कमिटीले अधिवेशनको मिति तोकेका छैनन्,’ एमालेको निर्वाचन आयोग प्रमुख विजय सुब्बाले जानकारी दिए।
अछाम जिल्लाका हकमा केन्द्रीय कार्यालयको समन्वयमा जिल्ला अधिवेशन स्थगित गरिएको एमालेले जानकारी दिएको छ। अछाम एमालेले निष्कासन गरेका भीम रावलको गृह जिल्ला हो। त्यस्तै सिराहा पार्टीका मधेस इन्चार्ज लीलानाथ श्रेष्ठको गृहजिल्ला हो।
जिल्ला अधिवेशन नभएका जिल्लामध्ये अछामलाई छोडेर अन्य जिल्लामा पालिका अधिवेशनसमेत हुन नसकेको एमालेले बताएको छ।
मोरङ जिल्ला कमिटीले भने अधिवेशन गरिरहेको छ। मोरङको दसौं जिल्ला अधिवेशन शनिबारबाट सुरू भएको छ।
आइतबारबाट त्यहाँ नेतृत्व चयनको प्रक्रिया सुरू हुने नेताहरूले बताएका छन्।
एमालेले माघ, फागुन र चैत महिनामा तीन महिने वडाकेन्द्रित ‘जरा’ अभियान चलाइरहेको छ।
वार्षिक कार्ययोजनाको अंगका रूपमा यो तीन महिने अभियान चलाइरहेको नेताहरूले बताएका छन्।
अभियानका क्रममा वडा, टोलकेन्द्रित भेला, अन्तरक्रिया कार्यक्रम गर्ने र सदस्यता वितरणलाई अघि बढाउने एमालेले बताएको छ।
