संघीय संसद् अन्तर्गत् प्रतिनिधि सभाको बैठकमा बँदेल र बाँदर नियन्त्रणसम्बन्धी सार्वजनिक महत्त्वको प्रस्ताव पेश हुँदैछ।
ग्रामीण भेगहरूमा बँदेर र बाँदरका कारण वस्ती नै विस्थापित हुने अवस्था आएको भन्दै नियन्त्रणका लागि सोमबार दिउँसो १ बजे बस्ने संसद बैठकमा प्रस्ताव पेश हुन लागेको हो।
‘नेपालका ग्रामीण क्षेत्रमा बाँदर र जंगली सुँगुर (बँदेल) को आतंकबाट खेतीबाली नष्ट भई किसानहरुको सुरक्षामा समेत खतरा पैदा भएकाले समस्याको दिर्घकालीन समाधान गर्दै कृषि सुरक्षाको सुनिश्चितता, वन्यजन्तु व्यवस्थापन र वातावरणीय सन्तुलन कायम राख्नका लागि नीति निर्माण र कार्यान्वयनको आवश्यकता भएकोले भन्ने विषयको जरुरी सार्वजनिक महत्त्वको प्रस्ताव प्रस्तुत गर्ने,’ प्रतिनिधि सभाको आजको सम्भावित कार्यसूचीमा उल्लेख छ।
यस प्रस्ताव सांसद राजेन्द्र बजगाईंले पेश गर्न लागेका हुन्। यस प्रस्तावमा सांसद उदयशमशेर राणा र सञ्जयकुमार गौतमले समर्थन गरेका छन्।
आजको बैठकमा प्रधानमन्त्री केपी शर्मा ओलीले अख्तियार दुरुपयोग अनुसन्धान आयोगको चौतीसौं वार्षिक प्रतिवेदन (आर्थिक वर्ष २०८०÷०८१) पेश गर्ने कार्यसूची छ।
त्यस्तै गृहमन्त्री रमेश लेखकले सशस्त्र प्रहरी बल, नेपाल विधेयक, २०८१ माथि विचार गरियोस् भन्ने प्रस्ताव प्रस्तुत गर्ने कार्यसूची छ।
आजकै बैठकमा सांसद शेरबहादुर कुँवरले सुदुरपश्चिम प्रदेश र कर्णाली प्रदेशका केही जिल्लाका विपन्न र पछाडि परेका नागरिकहरुले विभिन्न अस्पतालबाट निःशुल्क सेवा पाउँदै आएकोमा नेपाल सरकार र प्रदेश सरकारबाट प्रदान गरिने अनुदान रकमको अभाबले गर्दा सेवाबाट बञ्चित हुने अवस्था आएकोले उक्त अस्पतालहरुबाट पाउँदै आइरहेको सेवाको निरन्तरता हुनुपर्ने भन्ने सार्वजनिक महत्त्वको विषयमाथी स्वास्थ्य तथा जनसंख्या मन्त्री प्रदीप पौडेलको ध्यानाकर्षण गराउने कार्यसूची पनि छ।
उक्त प्रस्तावमाथी सांसद दयालबहादुर शाही र पुष्पबहादुर शाहले स्पष्टीकरण माग गर्ने कार्यसूचीसमेत छ।
