संघीय संसद् अन्तर्गत् शुक्रबार छवटा समितिको बैठक बस्दैछ। प्रतिनिधि सभा अन्तर्गत चारवटा र राष्ट्रिय सभाका दुईवटा समितिको बैठक बस्न लागेको हो।
प्रतिनिधि सभाको अर्थ समितिको बैठक बस्दैछ। बिहान ११ बजे समितिको सभा कक्षमा बस्ने बैठकमा भन्सारसम्बन्धी कानूनलाई संशोधन र एकीकरण गर्न बनेको विधेयक उपर संशोधनकर्ता सदस्यहरूसँग छलफल हुनेछ।
बिहान साढे ११ बजे कृषि, सहकारी तथा प्राकृतिक स्रोत समितिको बैठक बस्दैछ। समितिको सभा कक्षमा बस्ने बैठकमा स्वर्गद्वारी गुठी किसानहरूका समस्याबारे भूमि व्यवस्था, सहकारी तथा गरिबी निवारण मन्त्रालय र गुठी संस्थानसँग छलफल गर्ने कार्यसूची छ।
राज्य व्यवस्था तथा सुशासन समितिको ६४ औं बैठक पनि आज बस्दैछ। आज बिहान ११ बजे बस्ने बैठकमा संघीय निजामती सेवाको गठन, सञ्चालन र सेवाका शर्त सम्बन्धमा व्यवस्था गर्न बनेको विधेयक, २०८० माथि दफावार छलफलको कार्यसूची छ।
शिक्षा, स्वास्थ्य तथा सूचना प्रविधि समितिको बैठक पनि शुक्रबार बस्दैछ। बिहान ११ बजे समितिको सभा कक्षमा बस्ने बैठकमा सहिद दशरथ चन्द स्वास्थ्य विज्ञान विश्वविद्यालय विधेयक, २०८० का सम्बन्धमा विज्ञसँग छलफलको कार्यसूची छ।
राष्ट्रिय सभा अन्तर्गत विकास, आर्थिक मामिला तथा सुशासन समितिको बैठक पनि आजै बस्दैछ। मध्याह्न साढे १२ बजे बस्ने बैठकमा नेपाल अतिकम विकसित राष्ट्रबाट विकासशील राष्ट्रमा स्तरोन्नति हुने सम्बन्धमा अध्ययन प्रतिवेदन, २०८१ उपसमितिबाट समितिसमक्ष पेश र छलफल हुने कार्यसूची रहेको संसद सचिवालयले जानकारी दिएको छ।
राष्ट्रिय सभाकै सार्वजनिक नीति तथा प्रत्यायोजित विधायन समितिको बैठक पनि आज बस्दैछ। बिहान ११ बजे सिंहदरबारमा बस्ने बैठकमा राष्ट्रिय निकुञ्जहरूसँग सम्बन्धित नीतिगत समस्याहरूको समाधानको सम्बन्धमा प्राप्त सुझाव तथा विविध विषमा छलफल हुने समितिले बताएको छ।
-1738309832.jpg)
-1742801159.jpg)
