राष्ट्रिय स्वतन्त्र पार्टी (रास्वपा) का कार्यवाहक सभापति डोलप्रसाद अर्याल (डिपी) ले दलहरूमा युवाहरूको सहभागिता नबढेसम्म राजनीति सत्ताको खेलमै हुने बताएका छन्।
नेपाल समाजवादी पार्टी (नयाँ शक्ति) को प्रथम महाधिवेशनलाई आइतबार सम्बोधन गर्दै उनले रूपान्तरणकारी राजनीतिका लागि मूल्य-मान्यता, पारदर्शीता र जिम्मेवारीसहितको नेतृत्व अपरिहार्य रहेको बताए।
उनले वर्तमान सरकार जति बलियो छ त्यत्तिकै बलियो आंशका र बेथिति देखिएको टिप्पणी गरे। सरकारले संसद् छलेर अध्यादेश ल्याएको र व्यक्तिलक्षित निषेध र प्रतिशोधको राजनीति गरेको कारण सरकारप्रति जनताको विश्वास गुमेको बताए।
‘जबसम्म राजनीतिक दलभित्र युवाहरूको सहभागिता बढाउँदैनौं, नयाँ सोच र नयाँ दृष्टिलाई प्रोत्साहन गरिँदैन तबसम्म राजनीति सत्ताको खेलमै सीमित रहन्छ। जनताको वास्तविक स्थितिमा काम गर्न सकिँदैन। ट्रान्सफर्मेटिब राजनीतिका लागि मूल्य मान्यता, पारदर्शीता र जिम्मेवारीसहितको नेतृत्व अपरिहार्य छ। तर अहिलेको सरकारबाट भने यो पार लाग्ने सम्भावना देखिँदैन,’ उनले भने।
दुई तिहाइको वर्तमान सरकार निकै बलियो रहेको र यसले चाह्यो भने देशमा केही परिवर्तन ल्याउन सकिने उनले बताए।
‘तर आशंका र बेथिति पनि त्यत्तिकै बलियो देखिएका छन्। संसद छलेर ल्याएको अध्यादेशको विषय होस् वा व्यक्ति हेरेर निषेध वा प्रतिशोधको राजनीति गरेको विषय। धेरै यस्ता विषय छन्, जसका कारण सरकारप्रति विश्वास गुमेको र आशंका गर्नुपर्ने परिस्थिति बनेको छ,’ उनले भने।
संसद् बोलाउनुपर्ने समयमा नबोलाएर अध्यादेश ल्याउनुपर्ने त्यस्तो के विपत्ति आइपरेछ सरकारलाई भन्दै उनले प्रश्न गरे।
‘कसको स्वार्थपूर्ति गर्न हतार-हतार अध्यादेश ल्याएको हो? यसको जबाफ सरकारले दिनुपर्नेछ,’ उनले भने।
जनमुखी काम गरे रास्वपा सरकारलाई सधैं साथ र सहयोग गर्न तयार रहेको उनले बताए।
-न्युज एजेन्सी नेपाल
