राष्ट्रिय स्वतन्त्र पार्टी (रास्वपा) ले पार्टी सभापति रवि लामिछानेको सांसद पद फुकुवाका लागि सभामुखको पुनः ध्यानाकर्षण गराउने भएको छ।
संसदीय दलको बुधबार सिंहदरबारमा बसेको बैठकले सभापति लामिछानेको निलम्बन फुकुवाका लागि ‘फलोअप’ गर्ने निर्णय भएको सचेतक निशा डाँगीले जानकारी दिइन्।
त्यस्तै आज बसेको बैठकले विधेयक अध्ययनका लागि सांसद चन्दा कार्कीको नेतृत्वमा समिति गठन गरेको छ। उक्त समितिमा सांसद सोबिता गौतम र शिशिर खनाल सदस्य छन्। बैठकमा प्रमुख सचेतक सन्तोष परियार र सचेतक डाँगी पनि उपस्थित रहने गरी निर्णय गरिएको उनले बताइन्।
रास्वपा संसदीय दलले ताप्लेजुङको पाथीभरामा केबलकार निर्माणमा देखिएको द्वन्द्व यथाशीघ्र अन्त्य गर्न सरकारको ध्यानाकर्षण गराएको छ। त्यहाँका स्थानीयको मर्म र भावना आत्मसात गर्दै तत्काल समस्या समाधान गर्न पनि बैठकले ध्यानाकर्षण गराएको डाँगीले बताइन्।
रास्वपाले संसदीय दलको आन्तरिक क्यालेन्डर बनाउने भएको छ। त्यसमा आधारित रहेर दलको बैठक, विधेयक मन्थन आदि व्यवस्थित गर्ने पनि उनले बताइन्।
यसैबीच रास्वपा संसदीय दलले संवैधानिक आयोगसँग निरन्तर छलफल गर्ने र आयोगका गतिविधिबारे जानकारी राख्ने पनि निर्णय गरेको डाँगीले बताइन्।
