सहकारी ठगी र संगठित अपराध कसुरमा पक्राउ परेका राष्ट्रिय स्वतन्त्र पार्टी (रास्वपा) का सभापति रवि लामिछानेलाई हिरासतमा राखेर अनुसन्धान गर्न जिल्ला अदालत कास्कीले अनुमति दिएको छ।
गत शुक्रबार पक्राउ परेका सभापति लामिछानेलाई आइतबार अदालतमा उपस्थित गराइएको थियो।
अदालतका न्यायाधीश नवराज दाहालको इजलासले लामिछानेलाई ६ दिन हिरासतमा राखेर अनुसन्धान गर्न अनुमति दिएको अदालतका सूचना अधिकारी सुरज अधिकारीले सेतोपाटीलाई जानकारी दिए।
गत शुक्रबार पूर्वगृहमन्त्रीसमेत रहेका लामिछानेलाई प्रहरीले च:मतिस्थित पार्टी केन्द्रीय कार्यालयबाटै पक्राउ गरी पोखरा लगेको थियो।
संसदीय छानबिन विशेष समितिले विभिन्न सहकारीको रकम लामिछाने पहिले प्रबन्ध निर्देशक रहेको गोर्खा मिडियामा आएको देखिएकोले कारबाही सिफारिस गरेको थियो।
हिरासतमा राखेर अनुसन्धान गर्न प्रहरीले उनलाई आइतबार जिल्ला अदालत कास्कीमा उपस्थित गराएको थियो।
सहकारीको बचत अपचलन सम्बन्धमा छानविन गर्न बनेको संसदीय समितिले गोर्खा मिडियामा विभिन्न सहकारीबाट ६५ करोड रुपैया गैरकानुनी रुपमा लगेको र उक्त रकम खर्च गर्न लामिछानेको हात रहेको निष्कर्ष निकालेको थियो। सहकारी पीडितले लामिछानेविरूद्ध गत वर्ष माघ २२ गते जिल्ला प्रहरी कार्यालय कास्कीमा जाहेरी दिएका थिए।
यो पनि:
पोखरामा रास्वपा कार्यकर्तालाई प्रहरीले हान्यो अश्रुग्यास र पानीका फोहरा (तस्बिरहरू)
ओली सरकारविरूद्ध देशभरिबाट उत्रन आह्वान गर्छु: रवि लामिछाने (भिडिओ)
पोखरामा तोकियो निषेधित क्षेत्र, ५ जनाभन्दा बढी भेला हुन नपाइने
