नेपाली कांग्रेसका महामन्त्री गगन थापाले कांग्रेसलाई रूपान्तरण गर्न आफूहरूले पार्टीभित्रै संघर्ष गरिरहेको बताएका छन्।
कांग्रेस छाडेर बाहिर गएर खराब भन्ने प्रवृत्तिप्रति उनले आक्रोश पोखे।
तनहुँमा आज गोविन्द भट्टराईको उम्मेदवारी दर्ताअघिको सभामा बोल्दै महामन्त्री थापाले कांग्रेसलाई बदल्न पार्टीभित्रै बसेर संघर्ष गर्नुपर्ने बताए।
‘विदेशमा यति वर्ष, जागिर छाडेर आएको भन्नुहुन्छ भने मलाई त भन्न मन लाग्छ- तिमी त जागिर खाएको, घर बनाएको, पेन्सन पकाएर आएको हो। म सडकमा ढुंगा खाएर लडेर बसेको हो। जान नसक्ने भएर होइन। क्षमता नभएर होइन,’ केही दिनअघि कांग्रेस छाडेका स्वर्णिम वाग्लेप्रति लक्षित गर्दै उनले भने।
कोही कांग्रेसबाट अन्यत्र गएकोमा आफूहरूले प्रश्न नउठाएको उल्लेख गरेका उनले थपे, ‘तिमी गयौं भन्नेमा मेरो प्रश्न होइन। तर मलाई यहाँ बस्यौं भन्नेमा प्रश्न गर्यौ भने तिमी किन गयौं भन्ने म पनि प्रश्न गर्छु।’
उनले युवाहरूलाई आफू कांग्रेस रूपान्तरणका लागि संघर्ष गरिरहेको बताए।
‘देशैभरका तन्नेरीलाई आग्रह छ- हामी पनि सपना लिएर राजनीतिमा होमिएको हो। कांग्रेस बदल्न चाहेको हो। अहिले जे भइरहेको छ, सबै ठिक भइरहेको छैन। धेरै बदल्नुपर्नेछ,’ उनले भने, ‘तर नेपाली कांग्रेसलाई लात हानेर गएर बाहिरबाट कांग्रेस खराब भनेर झ्याल फुटाएर कांग्रेस बदलिन्छ? कांग्रेस बदल्न त्यहीँभित्र लड्नुपर्छ। संघर्ष गर्ने हो। हामीले संघर्ष गर्ने हो।’
