नेपाल कम्युनिष्ट पार्टी नेकपाका अध्यक्ष पुष्पकमल दाहाल प्रचण्डलाई लक्षित गर्दै काठमाडौंस्थित राष्ट्रिय सभा गृहमा जुत्ता प्रहार भएको छ।
आइतबार भरतमोहन अधिकारी स्मृति फाउण्डेशनले आयोजना गरेको प्रथम स्मृति सभाको कार्यक्रम सम्बोधन गरिरहेका प्रचण्डलाई लक्षित गर्दै जुत्ता प्रहार भए पनि उनलाई लागेको थिएन।
प्रचण्डले कार्यक्रमलाई सम्बोधन गरिरहेको भिडिओ उनको सचिवालयले फेसबुकमा लाइभ गरिरहेको थियो।
प्रचण्डले आफ्ना कुरा राखेर पोडियमबाट फर्कंदै गर्दा उनलाई लक्षित गर्दै जुत्ता प्रहार भएको हो। दर्शक बस्ने ठाउँबाट जुत्ता प्रहार भएपछि मञ्चमा रहेका सुरक्षाकर्मीहरू दौडेर ती व्यक्तिलाई पक्रन गएको भिडिओमा देखिन्छ।
नेकपा अनुशासन आयोगका अध्यक्ष अमृत बोहराले सेतोपाटीलाई दिएको जानकारी अनुसार जुत्ता प्रहार गर्ने व्यक्तिलाई प्रहरीले पक्राउ गरेको छ। उनको परिचय खुल्न बाँकी छ।
ती युवकलाई अहिले महानगरीय प्रहरी वृत्त सिंहदरबारले नियन्त्रणमा लिएको छ। प्रहरीले दिएको जानकारीअनुसार प्रहरीसँग ती युवकले आफ्नो नाम पनि भन्न मानेका छैनन्।
‘उनी सुस्त मनस्थितिकोजस्तो, बेहोस भएजस्तो गरिरहेका छन्। हामी उनको शरिर जाँच गरिरहेका छौं,’ एक प्रहरी अधिकारीले सेतोपाटीसँग भने।
