युरोपेली विमान निर्माता एयरबसले आगामी दुई दशकमा विश्वभर ४२ हजार ५२० वटा नयाँ जहाज आवश्यक पर्ने अनुमान गरेको छ।
एयरबसले एसिया–प्रशान्त क्षेत्रमा मात्र करिब २० हजार (ठिक १९ हजार ५६०)नयाँ विमानको आवश्यकता पर्ने अनुमान गरेको हो।
विश्वका सबैभन्दा बढी जनसंख्या भएका दुई देश भारत र चीनबाट हवाइ यात्रुको बढ्दो मागले विमानको आवश्यकता बढाएको अन्तर्राष्ट्रिय सञ्चार माध्यम सिम्पल फ्लाइङले लेखेको छ।
जस अनुसार यो संख्या विश्वभर आवश्यकता पर्ने कुल विमानमध्ये ४६ प्रतिशत हो। सिम्पल फ्लाइङ लेख्छ–‘भारतीय बजेट एयरलाइन्स इंडिगोले मात्र एयरबससँग करिब १ हजार नयाँ विमानको अर्डर राखिसकेको छ।’
कोभिडपछि विश्वभर हवाइ यात्रु वृद्धि भएको छ।
यात्रु वृद्धिसँगै वायुसेवा कम्पनीहरूले जहाज विस्तार तथा पुराना जहाज प्रतिस्थापन गर्न थालेका छन्। विशेषगरी नयाँ प्रविधियुक्त विमानमा इन्धन खर्च कम हुनुका साथै यात्रुलाई राम्रो सुविधा दिने भएकाले पनि कम्पनीहरूले नयाँ जहाज खरिद गर्न चाहेको देखिन्छ।
'एसिया–प्रशान्त एयरलाइन्स संघको हालसालै बैंककमा भएको बैठकमा आगामी २० वर्षमा तीन हजार पाँच सय वाइडबडी र १६ हजार न्यारोबडी विमान आवश्यक पर्ने अनुमान प्रस्तुत गरिएको थियो,’ सिम्पल फ्लाइङले लेखेको छ।
फ्लाइङका अनुसार यो संख्या विश्वभर आगामी दुई दशकमा डेलिभर हुने कुल विमानको ४७ प्रतिशतभन्दा बढी हो।
कुल मागमध्ये ६८ प्रतिशत विमान यात्रु वृद्धि र रूट विस्तारका लागि प्रयोग हुने छन्। बाँकी ३२ प्रतिशत पुराना विमान प्रतिस्थापनका लागि रहने बताइएको छ।
लो–कस्ट क्यारियरको विस्तारले माग बढ्दै विमानको माग बढ्नुको मुख्य कारण क्षेत्रीय अर्थतन्त्रको विस्तार, यात्रु वृद्धि र लो कस्ट क्यारियरको तीव्र वृद्धि हुन्।
एयर एसिया, इंडिगो, सेबु प्याफिकजस्ता ठूला एयरलाइन्सले निरन्तर जहाज थपिरहेका छन्। भारतमा हवाइ यात्रा सस्तो र सुविधा जनक बन्दै गएसँगै हवाइलाइन्सको दायरा दूरदराजका क्षेत्रसम्म फैलिएको छ। यसले व्यापार, पर्यटन र यातायातलाई अझ सुलभ बनाएको छ।
-1746009348.jpg)
