बागमती प्रदेशले चितवनलाई पर्यटन केन्द्रका रूपमा विकास गर्ने भएको छ। बुधबार प्रस्तुत नीति तथा कार्यक्रममार्फत प्रदेश सरकारले बागमती प्रदेशलाई देशकै प्रमुख पर्यटकीय गन्तव्यका रूपमा स्थापित गर्ने लक्ष्य पनि राखेको छ।
चितवनलाई प्रदेशको पर्यटन केन्द्रका रूपमा विकास गर्न आवश्यक नीति तर्जुमा गरिने नीति तथा कार्यक्रममा उल्लेख छ।
यसअघि जिल्ला समन्वय समिति चितवनको संयोजनमा जिल्लाका स्थानीय तह, पर्यटन व्यवसायीहरूसँगको छलफलबाट चितवनलाई बागमती प्रदेशको पर्यटनको राजधानी बनाउन प्रदेश सरकारलाई सिफारिस गर्ने निर्णय गरिएको थियो। जिल्ला समन्वय समितिका प्रमुख नारायणप्रसाद अधिकारीको नेतृत्वमा उक्त निर्णय प्रदेश सरकारलाई बुझाइएको थियो।
अधिकारीले जिल्लाले गरेको सिफारिसलाई प्रदेश सरकारले स्वीकार गरेको बताए। यो निर्णयले चितवनलाई समग्र देशकै प्रमुख पर्यटकीय गन्तव्यका रूपमा परिचत गराउने विश्वास गरिएको अधिकारीको भनाइ छ।
पर्यटन विज्ञ विश्वराज सुवेदीले पर्यटनको केन्द्र बनाउने निर्णय चितवनको पर्यटन विकासमा महत्वपूर्ण हुने बताए।
'चितवन देशकै तेस्रो पर्यटकीय गन्तव्य हो। पर्यटनको केन्द्र घोषणा गरेपछि यहाँका पर्यटन गन्तव्यहरूको प्रवर्द्धनमा थप टेवा पुग्नेछ। यसले समग्र प्रदेशलाई नै देशको प्रमुख पर्यटकीय गन्तव्यका रूपमा विकास गर्न सघाउँछ,' सुवेदीले भने।
प्रदेश सरकारले दोलखाको डाङडुङे डाँडालाई फिल्म सिटीका रूपमा विकास गर्ने प्रस्ताव गरेको छ। साथै प्रदेशलाई आरोग्य पर्यटनको आकर्षक स्थलका रूपमा विकास गनै निजी क्षेत्रसँग सहकार्य गर्ने नीति पनि प्रदेश सरकारले लिएको छ।
बागमती प्रदेशका ७ हजार मिटर भन्दा कम उचाइका अपरिचित हिमशिखरहरुको अन्वेषण र आरोहण प्रवर्द्धन गर्ने नीति तथा कार्यक्रममा उल्लेख छ।
प्रदेशको पर्यटन मन्त्रालयले सिन्धुपाल्चोकको डोल्मा खाङ हिमालको रूट अन्वेषण गर्न भनेर टोली पठाइसकेको छ।
साथै सहासिक पर्यटन क्षेत्रमा पर्यटकीय आगमनलाई बढावा दिन प्रदेशमा रहेका ६ हजार मिटरसम्मका हिमालहरूलाई ट्रेकिङ पिकका रूपमा विकास गर्ने नीति प्रदेश सरकारको छ।
