पर्वतारोही मौरिस हर्जोगको सम्झनामा फ्रान्सेली कलाकार टोलीले म्याग्दीको अन्नपूर्ण आधार शिविरमा सांगीतिक प्रस्तुती दिने भएका छन्।
सोही सफलताको सम्झनामा फ्रान्सेली सांगीतिक टोली नेपाल आएको ट्रेकिङ एजेन्सिज एशोसिएसन अफ नेपाल (टान) गण्डकीका अध्यक्ष कृष्ण आचार्यले जानकारी दिए।
‘अन्नपूर्ण हिमाल आरोहणको हिरक जयन्तीमा फ्रान्सेली कलाकार समूहले आधार शिविरमा सांगीतिक कार्यक्रम राखेका छन्,’ उनले भने, ‘कार्यक्रममा काठाडौंस्थित फ्रान्सेली राजदूत, मौरिस हर्जोगका छोरा र नाती लगायत अरू विशिष्ट पाहुना पनि जानुहुनेछ।’
मौरिस हर्जोगका छोरा म्याथिएस इम्यानुएल म्याक्सिमिलेन र नाती सिमोन ज्याक्युस, फ्रान्सेली पर्वतारोहण अनुसन्धानकर्ता र सांगीतिक टोली गरी १४ जना सहभागी हुने आचार्यले बताए।
मौरिस हर्जो विश्वमै ८ हजार मिटरभन्दा अग्लो हिमाल आरोहण गर्ने पहिलो फ्रान्सेली आरोही हुन्। सन् १९५० जुन ३ तारिखमा हर्जोग र लुइस लचेनले अन्नपूर्ण आरोहण गरेर इतिहास रचेका थिए। हर्जोगले पाएको सोही सफलताको सम्झनामा अन्नपूर्ण अधार शिविरमा फ्रान्सेली कलाकार टोली जान लागेका हुन्।
हर्जोग नेतृत्वको टोलीले अन्नपूर्ण आरोहण गरेपछि नेपाल विश्वभर आरोहणको केन्द्रमा परेको थियो। हर्जोगले लेखेको ‘अन्नपूर्ण’ पुस्तक अंग्रेजीमा अनुवाद भएपछि पर्वतारोहण क्षेत्रमा सबैभन्दा पढिने पुस्तक बनेको थियो।
अन्नपूर्ण आरोहणमा हर्जोग नेतृत्वको आरोहण दलले सफलता पाएको तीन वर्षपछि तेन्जिङ नोर्गे शेर्पा र न्यूजिल्याण्डका आरोही एडमण्ड हिलारीले सगरमाथा चुचुरो चुम्न सफल भएका थिए।
अन्नपूर्ण आरोहणमा फ्रान्सेली आरोही हर्जोगले सफलता पाएपछि फ्रान्समा तीन दिन राष्ट्रिय बिदा दिएर उत्सव मनाएका थिए।
अन्नपूर्ण आरोहणको ७५ औं वर्षगाँठलाई अन्नपूर्ण हिरक महोत्सवका रूपमा मनाउने तयारी गरेको म्याग्दीको अन्नपूर्ण गाउँपालिका अध्यक्ष भारतकुमार पुनले बताए। सो अवसरमा अन्नपूर्ण आरोहण गर्ने पहिलो आरोही मौरिस हर्जोग, लुइस लचेन र पहिलो नेपाली आरोही सोनाम वाङ्चुक शेर्पाको शालिक अनावरण गर्ने कार्यक्रम तय गरिएको उनले बताए।
प्रधानमन्त्री केपी शर्मा ओलीको उपस्थितिमा अन्नपूर्ण आधार शिविर पदमार्गको नाम ‘मौरिस हर्जोग पदमार्ग’ नामाकरणसमेत गरिने उनले बताए।
‘हिमाल आरोहणमा पहिलो पटक सफलता मिलेको अन्नपूर्ण हिमालको बेस क्याम्पमा तीनजना पहिलो आरोहीको शालिक बनाएका छौं। हिरक जयन्तीमा प्रधानमन्त्रीज्यूले अनावरण गर्ने कार्यक्रम छ,’ उनले भने, ‘जयन्तीमा फ्रान्सेली टोलीले सांगीतिक कार्यक्रम र अन्तर्क्रिया गर्नुहुनेछ। हामी पदमार्गको नाम पनि मौरिस हर्जोग पदमार्ग राख्दैछौं।’
अन्नपूर्ण हिमाल आरोहण गर्न म्याग्दीमा पर्ने अन्नपूर्ण आधार शिविर जानुपर्छ। जसलाई पर्वतारोहीले अन्नपूर्ण नर्थ बेस क्याम्प भन्छन्। दक्षिणतर्फको अन्नपूर्ण आधार शिविर भने कास्कीमा पर्छ।
अहिले अन्नपूर्ण आधार शिविर पदयात्रा जाने अधिकांश पर्यटक कास्कीमा पर्ने अन्नपूर्ण आधार शिविर साउथ जाने गर्छन्। उत्तरतर्फ पनि आधार शिविरसम्म होटल सञ्चालन गर्न अनुमति दिएको र पदमार्ग निर्माण गरेको अध्यक्ष पुनले बताए।
अन्नपूर्ण हिरक महोत्सवमा म्याग्दीमा रहेका सबै पालिका र अन्नपूर्ण गाउँपालिकाको सबै वडाबाट खेलाडी सहभागी हुने गरी म्याराथन प्रतियोगिता पनि आयोजना गरिएको छ। अन्नपूर्ण आधार शिविर नर्थबाट ४२ किरलोमिटर टाढा रहेको नारच्याङसम्म दौड प्रतियोगिता आयोजना गरिएको पुनले जानकारी दिए।
अन्नपूर्ण आरोहण दिवसकै अवसरमा दक्षिणतर्फको आधार शिविरबाट घान्द्रूकसम्म म्याराथन प्रतियोगिता आयोजना गरिएको छ। उक्त प्रतियोगितामा नेपाली र विदेशी धावकले भाग लिने अन्नपूर्ण सेन्चुरी पर्यटन समितिका अध्यक्ष ललित गुरूङले जानकारी दिए।
अन्नपूर्ण आरोहण दिवसका अवसरमा आयोजित हिरक महोत्सबमा नेपाल पर्यटन बोर्ड, अन्नपूर्ण संरक्षण क्षत्र आयोजना (एक्याप) टान गण्डकी र स्थानीय पर्यटन व्यवस्थापन समितिले सहकार्य गरेका छन्।
नेपाल पर्यटन बोर्ड गण्डकीका प्रमुख मणिराज लामिछानेले मौरिस हर्जोगले अन्नपूर्ण हिमाल आरोहण गरेपछि मात्र नेपाल पर्वतारोहणको केन्द्र बनेको बताए। नेपालमा रहेका हिमालहरू आरोहणका लागि मात्र नभई उक्त आरोहण पश्चात पदयात्राको गन्तव्य पनि नेपाल बनेको उनले बताए।
‘मौरिस हर्जोगले अन्नपूर्ण आरोहण गरेपछि लेखेको अन्नपूर्ण पुस्तकले नेपाललाई विश्वभर चिनायो,’ लामिछानेले भने, ‘त्यसपछि नै नेपालमा पर्वतारोहण र पदयात्राको विकास भएको पाइन्छ।’
अन्नपूर्ण आरोहणको ७५ औं वर्ष पूरा हुँदा आधार शिविरमै भव्य कार्यक्रम गरेर पर्यटन प्रवर्द्धन गर्न लागिएको उनले बताए।
