आर्थिक पत्रकारको छाता सङ्गठन आर्थिक पत्रकार समाज (सेजन)को नयाँ नेतृत्वका लागि आकाङ्क्षी पत्रकार चुनावी प्रतिस्पर्धामा दौडधूप गरिरहेका छन्।
सेजनको शनिबार हुने २७ औं वार्षिक साधारणसभा एवं कार्यसमिति चयनका लागि हुने अधिवेशनमा नेतृत्वका लागि आकाङ्क्षीले शुक्रबार उम्मेदवारी मनोनयन गराएका छन्।
सेजनको अध्यक्षमा भागवत भट्टराई, विश्वास रेग्मी र आशा थपलियाले उम्मेद्वारी दिएको निर्वाचन समितिले जनाएको छ।
उपाध्यक्षमा जीवन बस्नेत निर्विरोध निर्वाचित भएका छन्। महासचिवमा अच्युत पुरी र कमल बस्नेतले उम्मेद्वारी दिएका छन्।
सचिवमा शंकर पण्डित पनि निर्विरोध निर्वाचित भएका छन्। कोषाध्यक्षमा केशु लामिछाने र ममता थापाको उम्मेदवारी परेको छ।
त्यसैगरी कार्यसमिति सदस्यमा अर्जुन तामाङ, कमल धिताल, भरत बहादुर रावल, भोजराज भण्डारी र सीमा तामाङले उम्मेद्वारी दिएका छन्।
नेपाल पत्रकार महासङ्घका पुर्व अध्यक्ष धमेन्द्र झा मुख्य निर्वाचन अधिकृत, अधिवक्ता सन्तोष तिवारी र महासङ्घका महासचिव राम प्रसाद दाहाल निर्वाचन अधिकृत छन्।
शनिवार ११ बजेर ३० मिनेटमा इन्द्रेणी फुडल्याण्ड नयाँ बानेश्वरमा निर्वाचन हुनेछ। सेजनमा २६६ जना साधारण सदस्य छन्।
-1746009348.jpg)
