विश्व बैंकका दक्षिण एसियाका उपाध्यक्ष जोहान्स जुत्तले पाँच दिने नेपाल भ्रमण सम्पन्न गर्दै नेपालमा रूपान्तरणीय वृद्धिका लागि रोजगारी सिर्जनालाई सबैभन्दा महत्वपूर्ण चुनौतीका रूपमा औंल्याएका छन्।
‘१० वर्षपछि नेपाल फर्किंदा यहाँ शान्ति स्थिरता, सेवा प्रवाहमा सुधार, लोडसेडिङ अन्त्य, भूकम्प र कोभिड–१९ महामारीपछिको पुनःउत्थानमा देखिएको प्रगति उत्साहजनक छ,’ जुट्टले भने।
उनले विश्व बैंक समूहको नयाँ कन्ट्रि पार्टनरसिप फ्रेमवर्कको विषयमा छलफल गरेका थिए। यो फ्रेमवर्क सरकारको १६ औं योजनासँग मिल्दोजुल्दो छ।
यो फ्रेमवर्कले रोजगारी सिर्जना र विपद् प्रतिरोधात्मक क्षमतामा सघाउने बताइएको छ।
विश्व बैंकले यस फ्रेमवर्क अन्तर्गत २०२५ देखि २०३१ सम्म करिब २.७ अर्ब अमेरिकी डलर उपलब्ध गराउने लक्ष्य राखेको छ।
यसमार्फत पर्यटन, डिजिटल विकास र लगानीमैत्री वातावरण सुधारमार्फत अधिक र गुणस्तरीय रोजगारी सिर्जना गर्न जोड दिइनेछ।
‘हरेक वर्ष करिब पाँच लाख युवा श्रम बजारमा प्रवेश गर्ने अवस्थालाई मध्यनजर गर्दै रोजगारी सिर्जना अब अत्यावश्यक बनेको छ, उनले भने,’ सरकार, निजी क्षेत्र र विकास साझेदारसँग सहकार्य गरेर सुधार र लगानीलाई गति दिन विश्व बैंक प्रतिबद्ध छ।’
जुट्ट यसअघि सन् २०१३ देखि २०१५ सम्म नेपालका लागि विश्व बैंकका देश निर्देशक रहेका थिए। उनले सन् २०२५ जुलाई १ मा दक्षिण एसियाका उपाध्यक्षको पद सम्हालेका हुन्।
जुट्टले उपप्रधान तथा अर्थमन्त्री विष्णु पौडेल, उपप्रधान तथा शहरी विकास मन्त्री प्रकाशमान सिंह र नेपाल राष्ट्र बैंकका गर्भनर डा. विश्व पौडेलसँग भेटवार्ता पनि गरेका छन्।
-1746009348.jpg)
