इसेवाका चिफ स्ट्राटेजी अफिसर रवि शाक्यले ग्राहकहरूको हेलचेक्र्याइँ र लोभका कारण डिजिटल वित्तीय प्रणालीमा सुरक्षा चुनौती बढेको बताएका छन्।
सेतोपाटीले आयोजना गरेको 'फिनटेक कन्क्लेभ' अन्तर्गत ‘प्रायाक्टिकल च्यालेन्जेज इन डिजिटल पेमेन्ट्स’ विषयक छलफलमा उनले सुरक्षा सुनिश्चित गर्न अन्तर्राष्ट्रिय अभ्यास अपनाइएको भए पनि हाल सबैभन्दा ठूलो चुनौती ग्राहक पक्षबाट नै रहेको उल्लेख गरे।
उनका अनुसार नेपालमा वित्तीय साक्षरताको अभावले डिजिटल भुक्तानी प्रणालीमा जोखिम बढाइरहेको छ।
साथै, यहाँ आवश्यक पूर्वाधारको अभावमा साना वित्तीय संस्थाहरूले आफ्नै डेटा सेन्टर व्यवस्थापन गर्नु परेको उनले बताए।
'ग्राहकको व्यवहार सधैं एकैनासको हुँदैन। कुनै अवसरमा प्रणाली धेरै प्रयोग हुन्छ, कुनै बेला निकै कम। तर, हामीले प्रणालीलाई निरन्तर स्थिर राख्नैपर्ने हुन्छ, जसले लागत बढाएको छ,' शाक्यले भने।
उनका अनुसार यस्तो लगानी क्लाउड इन्फ्रास्ट्रक्चर तथा वित्तीय साक्षरतामा गरिन सकेमा डिजिटल कारोबारलाई अझ सुरक्षित र प्रभावकारी बनाउन सकिनेछ।
