नेपाल उद्योग वाणिज्य महासंघ (एफएनसिसिआई) का अध्यक्ष चन्द्र प्रसाद ढकालले डिजिटल पूर्वाधारहरू सरकारले नै विकास गर्नुपर्ने बताएका छन्।
मंगलबार सेतोपाटीले आयोजना गरेको फिनटेक कनक्लेभमा बोल्दै अध्यक्ष ढकालले हाल निजी कम्पनीहरूले व्यक्तिगत रूपमा विकास गर्नुपर्ने अवस्था रहेको बताए।
‘वास्तवमा डिजिटल पूर्वाधार सरकारले विकास गर्नुपर्छ भन्ने मेरो धारणा छ। यसले समग्र डिजिटलाइजेसनमा सहयोग पुग्नेछ। डिजिटल पेमेन्ट लगायत जति पनि बैंक तथा वित्तीय संस्था छन्। सबैलाई सहज र उचित मूल्यमा सेवा प्रवाह गर्नमा पनि यसले उल्लेख्य भूमिका खेल्छ भन्ने मलाई लाग्छ,’ उनले भने।
डिजिटलाइजेसनको कुरा गरिरहँदा जति विकास भयो यसमा सुरक्षा चुनौतीहरू पनि उति नै रहेको उनले बताए।
‘सुरक्षाको सम्बन्धमा बैंक तथा वित्तीय संस्थाहरू त त्यतिकै चनाखो हुनुपर्नेछ। अर्को एउटा हामीले हेर्नुपर्ने के छ भने बैंक तथा वित्तीय संस्था र सम्बन्धित संस्थाहरूबीच संयुक्त समन्वय हुन सक्यो भने प्रभावकारी हुन्छ,’ उनले भने।
साइबर सुरक्षा लगायत विषयमा बैंक तथा वित्तीय संस्थाले मात्रै नभएर नीति निर्माताले नै ध्यान दिनुपर्ने उनले उल्लेख गरे।
